Türkmenistanyň yzygiderli çempiony bolýan «Galkan» hokkeý kluby ýene ýurdumyzyň iň güýçli topary adyna eýe bolmaga başardy. Içeri işler ministrliginiň sport klubunyň hokkeýçileri Goranmak ministrliginiň Harby institutynyň «Watançy» toparyny 8:1 hasabynda üstün çykyp, milli çempionatyň tamamlanmagyna dört tapgyr galanda şeýle derejä ýetdiler.

Türkmenistanyň Bedenterbiýe we sport boýunça döwlet komitetiniň ýardam bermeginde Milli hokkeý federasiýasynyň guran ýurdumyzyň 8-nji çempionaty 2022-nji ýylyň 22-nji noýabrynda başlandy. Milli çempionatyň medallary ugrunda «Galkan» we «Watançydan» başga-da, «Türkmengaz» döwlet konserniniň «Oguzhan», IIM-niň institutynyň «Nesil» we Serhet goşunlary institutynyň «Merdana» hokkeý klublary dört aýlawly ýaryşda bäsleşýärler. Çempionatyň oýunlary 2014-nji ýylda türkmen halkynyň Milli Lideri Gurbanguly Berdimuhamedowyň gatnaşmagynda dabaraly ýagdaýda açylan Türkmenistanyň Içeri işler ministrliginiň «Galkan» gyşky oýunlar sport merkeziniň buz meýdançasynda geçirilýär.

«Galkan» hokkeý boýunça 8-nji gezek Türkmenistanyň çempiony diýen ada eýe boldy. IIM-niň klubunyň we milli ýygyndy toparynyň baş tälimçisi Baýram Allaýarow ýeňiji topary bu üstünlige ýetirdi.

IIM-niň klubunyň hokkeýçileriniň ýeňşi tötänleýin däldir. Ýurdumyzyň çempiony bolan toparyň oýunçylarynyň 95 göterimi milli toparyň oýunçylarydyr, ýygyndymyz ýakyn wagtda şu ýylyň 17-23-nji apreli aralygynda Günorta Afrika Respublikasynda geçiriljek «A» toparyň üçünji diwizionynda dünýä çempionatyna taýýarlygyň soňky tapgyryny geçirer.

«B» toparyň ikinji diwizionynda bäş ýurduň: Lýuksemburgyň, Tailandyň, Taýwanyň, Türkmenistanyň, Günorta Afrika Respublikasynyň toparlary ýaryşa gatnaşmak ugrunda bäsleşerler. Türkmenistanyň milli ýygyndysy ilkinji oýnunda 17-nji aprelde çempionatyň meýdança eýeleri - Günorta Afrika Respublikasynyň topary bilen duşuşar. 18-nji aprelde Baýram Allaýarowyň şägirtleri Lýuksemburgyň, 20-nji aprelde - Tailandyň we 22-nji aprelde Taýwanyň ýygyndylaryna garşy oýnar.