Ýagşygeldi Kakaýew adyndaky Halkara nebit we gaz uniwersitetinde bu ýokary okuw mekdebiniň binýadynda Lu Ban ussahanasynyň döredilmegi ara alyp maslahatlaşyldy.
Şu taslamanyň nukdaýnazarydan ýolbaşçylaryň, uniwersitetiň professor-mugallymlar düzüminiň we Hytaýyň «International Ltd» milli nebit gaz korporasiýasynyň Türkmenistandaky wekilleriniň, şeýle hem Hebeý nebit professional-tehniki uniwersitetiniň we Sian nebit uniwersitetiniň wekilleriniň gatnaşmagynda iş duşuşygy geçirildi.
Mälim bolşy ýaly, Türkmenistanda «Lu Banyň ussahanasy» taslamasyny durmuşa geçirmek barada teklip şu ýylyň ýanwar aýynda Pekinde geçirilen ýokary derejeli gepleşikleriň jemi boýunça Türkmenistanyň Prezidenti Serdar Berdimuhamedowyň we HHR-yň Başlygy Si Szinpiniň gol çeken Bilelikdäki beýannamasynda bellenilýär.
Ýagşygeldi Kakaýew adyndaky Halkara nebit we gaz uniwersitetde geçirilen tematiki duşuşykda ýurdumyzyň bu ýokary okuw mekdebinde Lu Ban ussahanasynyň döredilmegi bilen baglanyşykly bilelikdäki meýilnamalar we anyk meseleler «Lu Ban Workshop» taslamasyny durmuşa geçirilmegi ara alnyp maslahatlaşyldy.
Hususan-da, ussahana üçin bilim binýadynyň üpjünçiligi we onuň işini häzirki zaman dünýä ülňülerine laýyk derejesinde guramak barada gürrüň edildi. Geljekki ýokary derejeli hünärmenleri taýýarlamak bilen baglanyşykly meseleler, şol sanda olary taýýarlamagyň usullary, okuw meýilnamalary we maksatnamalary, nebit we gaz pudagynda zähmet çekýän işgärleriň bilim taýdan hünärlerini ýokarlandyrmak üçin okuwlar hem-de amaly sapaklar guramak we başga-da ençeme meseleler jikme-jik ara alnyp maslahatlaşyldy. Kärdeşleriň duşuşygynda ussahanany hytaý tarapyndan ýokary hilli okuw enjamlary bilen üpjün etmek boýunça aýratyn üns çekildi.
Çärä gatnaşyjylar paýtagtymyzyň ýokary okuw mekdebinde Lu Ban ussahanasynyň açylmagynyň çalt ösýän innowasiýa tehnologiýalar şertlerinde bilimli we kärine ýokary derejeli ussat hünärmenleriň, inženerleriň, tehnologlaryň kemala gelmegine ýardam etjekdigine ynam bildirdiler.
Lu Banyň ussahanalary gadymy meşhur hytaý oýlap tapyjysynyň hatyrasyna şeýle atlandyrylýar. Ussahanalaryň şu usuly Hytaýyň Týanszin şäherinde oýlanyp tapyldy. Olarda geljekki hünärmenleri önümçiligi awtomatlaşdyrmak, energitika, gurluşyk, ulag, aragatnaşyk, IT we hat-da adaty hytaý lukmançylygy boýunça hem taýýarlaýarlar.
Hytaýda dörän Lu Banyň ussahanalar ulgamy wagty bilen dünýäde meşhurlyk gazandy. Häzirki wagtda şeýle ussahanalar Aziýanyň, Ýewropanyň we Afrikanyň 20-den gowrak ýurdunda üstünlikli işleýär. Lu Banyň ussahanalary hünär bilim ulgamynda hyzmatdaşlyk üçin täze platforma döreden ägirt uly taslamadyr.
