Türkmenistanyň Telekommunikasiýalar we informatika instituty Türkmenistanyň Döwlet Medeniýet merkeziniň Döwlet kitaphanasy bilen bilelikde kitap sergisini gurady.

Gündogaryň beýik şahyry we filosofy Magtymguly Pyragynyň 300 ýyllyk ýubileýine bagyşlanan sergidäki kitaplar bu akyldaryň ömri we döredijiligi barada gürrüň berýär. Tematiki kitap toplumynda şahyryň türkmen we daşary ýurt dillerinde neşir edilen müdimi eserleri, dürli ýazyjylaryň Magtymguly hakda kitaplary we başga-da köp zatlar bar.

Sergide Gahryman Arkadagymyzyň türkmen halkyna peşgeş eden we Watanymyza, onuň taryhyna hem-de häzirki döwrüne, halkymyzyň gadymy medeniýetine, milli ruhy we ahlak gymmatlyklaryna hem-de asylly däplerine bagyşlanan edebi şeýlede filosofik eserlerine aýratyn orun berildi.

Sergi şu ýylyň 5-nji maýyna çenli ähli gyzyklanýanlar üçin açykdyr. Şu döwürde institutda birnäçe tematiki döredijilik we medeni çäreler geçiriler. Kitap sergisi we institutdaky beýleki çäreler 2023-nji ýylyň Türkmenistanda «Arkadag Serdarly bagtyýar ýaşlar ýyly» şygary we Magtymguly Pyragynyň 300 ýyllyk ýubileýi mynasybetli geçirilýär.

Çäreler maksatnamasynda mugallymlaryň we talyp ýaşlaryň gatnaşmagynda döredijilik agşamy göz öňünde tutulan, onda institutyň talyplary Gahryman-Arkadagyň eserlerinden parçalary we Magtymgulynyň daşary ýurt dillerindäki goşgularyny okarlar.

Serginiň çäklerinde tegelek stoluň başynda duşuşyk hem geçiriler. Oňa Türkmenistanyň Döwlet medeniýet merkeziniň Döwlet kitaphanasynyň işgärleri, bu ýokary okuw mekdebiniň mugallymlary we talyplary gatnaşarlar. Duşuşyk tutuş döredijilgi bilen eziz halkyna, agzybirligiň, jebisligiň we parahatçylygyň, garaşsyz döwlet gurmagyň beýik maksatlaryna hyzmat eden akyldar we filosof, nusgawy şahyr Magtymgula bagyşlanar.