Türkmenistanyň Konstitusiýasynyň we Döwlet baýdagynyň güni baýramynyň öňüsyrasynda ýurdumyzyň bilim edaralarynda dabaraly çäreler geçirilýär.

Şu hepdede paýtagtymyzyň orta we ýokary mekdeplerinde Aşgabat şäheriniň Medeniýet bölüminiň Merkezleşdirilen kitaphana ulgamy, kitaphana şahamçalary, şeýle hem Türkmenistan Demokratik partiýasynyň Aşgabat şäher komiteti bilelikde talyplar bilen aýdym-sazly döredijilik maksatnamalary we duşuşyklar guraldy.

Kitaphanalaryň wekilleri ýaş nesle baýramyň ähmiýeti we gelip çykyşynyň taryhy barada gürrüň berdiler.

1992-nji ýylyň 18-nji maýynda garaşsyz Türkmenistanyň Konstitusiýasynyň kabul edilmegi ýurduň syýasy ösüşinde täze bir eýýam döretdi. Türkmen halkynyň parahatçylyk, döredijilik, ynsanperwerlik we ýagşylyk ideallaryna ygrarlydygyny alamatlandyrýan Watanyň ýaşyl baýdagy çuňňur taryhy köklere eýedir.

Konstitusiýa we Türkmenistanyň Döwlet baýdagynyň gününiň her ýyl bellenmegi raýatlaryň we, esasanam, ýaşlaryň arasynda konstitusion gymmatlyklary döretmäge hem ýaýratmaga gönükdirilendir. Şonuň üçin bu ýyl «Arkadag Serdarly bagtyýar ýaşlar» şygary bilen geçirilýän bu goşa baýram aýratyn ähmiýete eýedir.

Döwlet üçin häzirki ýaş nesliň öz isleglerini garaşsyz we bitarap Türkmenistanyň bähbidine durnuklylygy we sosial sazlaşygy berkitmek bilen baglanyşdyryp, ata-babalarynyň mirasyny ýeterlik derejede gorap saklamagy örän möhümdir.