Türkmenistanyň Daşary işler ministrliginiň Halkara gatnaşyklary institutynda bu ýokary okuw mekdebinde magistr maksatnamasy boýunça bilim alan hünärmenleriň ikinji goýberilişi dabaraly çäre bilen bellenildi.
Şu ýyl Diplomatiýa ýokary mekdebini alty ─ «Halkara jemgyýetçilik hukugy», «Halkara hususy hukuk», «Sanly diplomatiýa», «Gündogary öwreniş», «Seljerme we strategiki meýilnamalaşdyryş», «Syýasy kommunikasiýa we internet-žurnalistika» ugurlar boýunça 53 magistr tamamlady.
Ýokardakylardan ilkinji üç ugur 2021-2022-nji okuw ýylynda, Türkmenistanyň Daşary işler ministrliginiň Halkara gatnaşyklary institutynda ilkinji gezek ýokary bilimiň ikinji basgançagynda - magistraturada okadylyp başlanda girizildi. 2022-2023-nji okuw ýylynda degişlilikde magistr taýýarlygynyň ýene üç ugry peýda boldy, şu ýylky magistraturany tamamlan hünärmenleriň 53-siniň 16-sy şu uugrlardan taýýarlanyldy.
Uçurymlar döwlet synaglaryndan üstünlikli geçip, magistrlik dissertasiýalaryny goradylar. Diplom gowşurmak dabarasynda diplomatik ýokary okuw mekdebiniň ýolbaşçylary, professorlary we mugallymlary olary mähirli gutladylar.
Magistraturany tamamlanlara ýüzlenip, ýokary okuw mekdebiniň wekilleri olaryň ajap geljegine we okuw döwründe alnan bilimleriň, başarnyklaryň, tejribäniň, ýokary hünäriň ýurdumyzyň daşary ýurtly hyzmatdaşlar bilen netijeli gatnaşyklaryny mundan beýläk-de ösdürmäge, Türkmenistanyň ählumumy parahatçylygy, howpsuzlygy we durnuklylygy berkitmäge we gazanmaga gönükdirilen halkara başlangyçlaryny ilerletmäge hyzmat etjekdigine berk ynam bildirdiler.
Häzirki zaman diplomatik gurşawda, halkara gatnaşyklarynyň wajyp we işjeň ösýän ugurlarynda islegli ýokary hünärli işgärleriň taýýarlanylmagynyň Türkmenistanyň dünýä jemgyýetindäki ähmiýetini we ornuny has-da güýçlendirjekdigi nygtaldy.
Magistr maksatnamasynyň bir okuw ýylyna niýetlenendigini we halkara gatnaşyklarynda ýöriteleşen hem-de çuňňur hukuk bilimini almaga isleg bildirýän bakalawrlara, döwlet edaralarynyň we jemgyýetçilik guramalarynyň ýaş hünärmenlerine niýetlenendigini bellemek gerek.
Okuw döwründe taýýarlygyň saýlanan ugruna laýyklykda, talyplar degişli ugurlar boýunça öňdebaryjy halkara tejribäni we innowasion milli tejribäni göz öňünde tutup, okuw meýilnamasyna girizilen degişli dersleri özleşdirdiler.
Geçilenleri berkitmek maksady bilen magistraturanyň talyplary döwlet edaralarynyň hünärmenleriniň ýolbaşçylygynda özbaşdak amaly, toparlaýyn işleri ýerine ýetirdiler, iş ýüzünde ýüze çykýan ýagdaýlar hem-de olaryň çözgüdi barada bilelikdäki ara alyp maslahatlaşmalara we çekişmelere gatnaşdylar.
Mundan başga-da, talyplar ylmy-barlag işlerine, tematiki halkara we döwlet ylmy-amaly maslahatlara, ylmy forumlara işjeň gatnaşdylar.
Institutyň düzümindälki Durnukly ösüş maksatlary boýunça Ylmy-usulyýet merkezinde, Türkmenistanyň diplomatiýasynyň ileri tutulýan ugurlary boýunça okuw merkezinde, Ylmy strategiki gözlegler merkezinde tejribe geçilmegi magistrlik maksatnamasynyň möhüm bir ugry boldy.
