Türkmen wekiliýeti Hytaýyň Nebit uniwersitetiniň 70 ýyllygyna bagyşlanyp, 1-2-nji oktýabrda Pekinde geçirilen «Uglerodyň zyýansyzlygyna tarap: bilim, tehnologiýalar, zehinler» atly halkara maslahata gatnaşdy.
Foruma milli we halkara energetika uniwersitetleriniň we ylmy-barlag institutlaryň wekilleri ýygnandy. Türkmen wekiliýetiniň düzümine Ýagşygeldi Kakaýew adyndaky Halkara nebit we gaz uniwersitetiniň wekilleri girdi.
Maslahat yzygiderli geçirildi we uglerod zyýansyzlygy bilim ulgamlary, ylmyň we tehnologiýanyň uglerodyň zyýansyz geljegi boýunça temaly sessiýalary, şeýle hem zyýansyz uglerod ulgamlaryny ösdürmek pudagyna degişli ýaş zehinleriň gatnaşmagyndaky forumy öz içine aldy. Mejlislerde uglerodyň zyýansyzlygyny gazanmak we «ýaşyl energetika» geçmegiň geljegi bilen baglanyşykly meseleler giňden ara alnyp maslahatlaşyldy.
«Uglerodyň zyýansyzlygy babatynda ylym we tehnologiýanyň geljegi» atly forumda Ýagşygeldi Kakaýewiň adyny göterýän Halkara nebit we gaz uniwersitetiniň rektory Baýrammyrat Atamanow «Türkmenistanyň nebit-gaz pudagynda ylym, bilim we innowasion tehnologiýalar» temada çykyş etdi.
Halkara forum uglerodyň zyýansyzlygyny we adamzadyň durnukly ösüşini üpjün etmek üçin dünýä energetikasyndaky ylym, bilim we tehnologiýa pudagynda ýaş zehinleriň arasynda pikir alyşmaga, bilimdir tejribelerini baýlaşdyrmaga uly goşant goşdy.
Pekinde geçen duşuşygyň netijeleri boýunça Ýagşygeldi Kakaýew adyndaky Halkara nebit we gaz uniwersiteti bilen Hytaýyň Nebit uniwersiteti ylym we bilim pudagynda hyzmatdaşlyk boýunça özara düşünişmek Ähtnama gol çekdi.
Hytaý Nebit uniwersiteti Hytaý Halk Respublikasynyň Bilim ministrliginiň ygtyýaryndaky iň uly milli uniwersitetdir. Ol «211-nji taslamanyň» – esasy milli uniwersitetleriň we kollejleriň hünärmenleri taýýarlamaga, ýokary derejeli uniwersitetleriň ylmy-barlag ülňülerini ýokarlandyrmaga we durmuş-ykdysady ösüş strategiýalaryny işläp düzmäge gönükdirilen taslamanyň agzasydyr. Bu ýokary okuw mekdebi Hytaýda ýokary bilim ulgamyny ösdürmek boýunça uly göwrümli taslama bolan «985-nji taslama» gatnaşýar.
Ý.Kakaýew adyndaky Halkara nebit we gaz uniwersiteti dünýäniň abraýly uniwersitetleri we iri senagat şereketleri bilen bilelikde özara peýdaly köptaraply hyzmatdaşlygy giňeltmek maksady bilen, ýokary hünärli hünärmenleri taýýarlamak arkaly dünýäniň ylym we bilim giňişligine işjeň gatnaşýar.
Hususan-da, Hytaý bilen hyzmatdaşlyk Ýagşygeldi Kakaýew adyndaky Halkara nebit we gaz uniwersiteti bilen Hytaýyň Nebit uniwersitetiniň arasynda baglaşylan özara düşünişmek Ähtnamasy, şeýle hem Ýagşygeldi Kakaýew adyndaky Halkara nebit we gaz uniwersiteti bilen Hytaýyň Milli nebit korporasiýasynyň arasynda gol çekilen Özara düşünişmek Ähtnamasy esasynda amala aşyrylýar.
Taraplaryň arasynda işjeň we netijeli gatnaşyk ýola goýlupdyr. Hyzmatdaşlygyň çäginde dürli ylmy we bilim häsiýetli çäreler yzygiderli geçirilýär.
