Türkmenistanyň Ylymlar akademiýasynyň Seýsmologiýa we atmosferanyň fizikasy instituty 1948-nji ýyldaky Aşgabat ýer titremesiniň 75 ýyllygyna bagyşlap ylmy-nazary konferensiýa geçirdi.

Bu çäräniň «Seýsmik töwekgellik we dünýä tejribesi» mowzugy ýer titremeler baradaky taryhy maglumatlary göz öňüne tutmak bilen häzirki zaman şäher gurluşygy meselelerini gozgady.

Konferensiýa guramaçy institutdan başga-da Türkmenistanyň Gurluşyk we binagärlik ministrliginiň Ýer titremä çydamly gurluşyk ylmy-barlag institutynyň, Aşgabat şäher häkimliginiň gurluşyk işlerini utgaşdyrmak bölüminiň wekilleri, «Türkmenaragatnaşyk» gullugynyň sanly ykdysadyýeti ösdüriş bölüminiň hünärmenleri gatnaşdylar.

Türkmen kärdeşleri bilen öndürijilikli hyzmatdaşlyk we Ýaponiýanyň ýer titremeler sebäpli ýüze çykan tebigy betbagtçylyklaryň netijelerini ýeňip geçmek boýunça tejribesi barada Ýaponiýanyň Türkmenistandaky Halkara hyzmatdaşlyk guramasynyň (JICA) bilermenler wekiliýetiniň agzasy seýsmolog Jun Matsuo gürrüň berdi.

Häzirki wagtda biziň ýurdumyzda JICA-nyň tehniki hyzmatdaşlyk taslamasynyň çäginde ýer titremesine gözegçiligi gowulandyrmak boýunça ylmy-barlag işleri alnyp barylýar.

Arkadag we Balkanabat şäherleri boýunça seýsmik sebitleşdiriş kartalary işlenip düzülýär. Şeýle hem Türkmenistanyň Seýsmologiýa ylmy-barlag institutynyň işgärleri seýsmik düzgüniň sebitleýin we anomal kanunalaýyklyklaryny öwrenýärler.

Institutyň amala aşyrýan seýsmik-geofiziki, geodinamiki, gidrodinamiki we geohimiki toplumlaýyn gözegçiligi ýer titremeleriň hasaba alynmagyny we dessine seýsmik maglumatlaryň Türkmenistanyň degişli edaralaryna berilmegini üpjün etmegiň açarydyr.

Ýüze çykjak howplary wagtynda bilmekde we kesgitlemekde amaly endikleri öwrenmek tebigy betbagtçylyga çydamlylygy ýokarlandyrmaga kömek edýär.