17-nji oktýabrda Türkmenistanyň Daşary işler ministrliginiň Halkara gatnaşyklary institutynyň we Ýaş diplomatlaryň mekdebiniň guramagynda geçirilýän «Parahatçylygyň ýaş çaparlary» atly akyl-paýhas bäsleşiginiň III möwsümine saýlap alyş bäsleşiginiň ilkinji oýunyny geçirmäge taýýarlyk görýärler.
«Parahatçylygyň ýaş çaparlary» atly akyl-paýhas bäsleşigine 9-njy, 10-njy we 11-nji synp okuwçylary gatnaşyp bilýärler. Iň ukyply we zehinli gatnaşyjylar kesgitlenende, olaryň geljekde üstünlikli diplomatik işgäri bolmak üçin çuňňur bilimlere eýedikleri we aýratynlyklary kesgitlener.
Geçen aýda bäsleşige gatnaşmaga isleýän okuwçylar üçin barlagnama geçirildi. Onda paýtagtymyzyň we ýurdumyzyň ähli welaýatlaryndan 600-den gowrak orta mekdepleriň okuwçylary gatnaşdy.
Saýlap seljerme synagynyň netijeleri boýunça taslamanyň täze möwsümine gatnaşmak hukugyny 64 okuwçy gazandy. Şolardan hem «Parahatçylygyň ýaş çaparlary» atly akyl-paýhas bäsleşiginiň seljeriş tapgyrynyň geljekki sekiz oýnunyň gatnaşyjylary boljak sekiz topar düzülýär.
Gündogaryň beýik akyldar şahyry Magtymguly Pyragynyň doglan gününiň 300 ýyllygy mynasybetli taslamanyň täze möwsümi 2023-2024-nji okuw ýylynda «Beýik Magtymguly Pyragynyň taglymaty – umumadamzat gymmatlyklarynyň milli şamçyragy» şygary bilen geçiriler. Şundan ugur alnyp, bäsleşikde akyldar şahyryň ömri we edebi mirasy, onuň eserleri, şahyr hakda gürrüň berýän kitaplar hem-de filmler boýunça sowallar bolar.
Bäsleşigiň özboluşlylygyny göz öňünde tutup, her bir oýun belli bir taryhy döwürdäki türkmen döwletleriniň daşary syýasaty we diplomatiýasy temasyndan geçiriler. Bäsleşigiň sowallary türkmen, şeýle hem daşary ýurt dillerinde bolar.
Birinji oýnuň temasy: «Döwletmämmet Azady we onuň ýaşan döwründe Merkezi Aziýada halkara gatnaşyklary». Bäsleşigiň seljerme tapgyryndan soňraky oýunlar şu aşakdaky temalarda bolar:
Sefewi döwletiniň XVII asyryň ahyrynda – XVIII asyryň başynda halkara gatnaşyklary we diplomatiýasy;
Owşar döwletiniň daşary syýasaty we halkara gatnaşyklary we başgalar.
Ýene bir hepdeden bäsleşige gatnaşmaly oýunçylaryň ilkinji topary üçin hödürlenýän kitaplaryň sanawy bilen ýurdumyzyň Daşary işler ministrliginiň Halkara gatnaşyklary institutynyň www.iirmfa.edu.tm resmi saýtynda tanşyp bolar.
