«Ylym» neşirýaty ýakyn wagtda türkmen alymlarynyň nusgawy türkmen şahyry Magtymguly Pyragynyň doglan gününiň 300 ýyllygyna bagyşlap taýýarlan kitaplaryny çykarmagy meýilleşdirýär. Olaryň arasynda Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar instituty tarapyndan neşir edilmegi teklip edilen üç kitap bar.

Filologiýa ylymlarynyň doktory Ahmet Mämmedowyň «Magtymguly türki halklaryň edebiýatynda» atly kitabynda, türki dilli edebiýatçylaryň Gündogaryň görnükli akyldarynyň eserlerini öwrenişi, Magtymgulynyň türki dillerdäki goşgy ýygyndylarynyň dürli neşirleri barada köp sanly material jemlenipdir. Kitabyň ýazary türki dilli okyjylaryň Magtymguly Pyragyny öz milli şahyry hasaplaýandyklaryny belleýär. Alym şahyr Ahmet Mämmedowyň bu täze kitabynda gyzykly ylmy maglumatlar bar.

Türkmeniň nusgawy şahyrynyň döredijiligini öwrenýänleri we oňa muşdaklary tanymal alym Gurbandurdy Geldiýewiň «Magtymgulynyň eserlerinde ýer-ýurt atlary we olaryň poetikasy» atly monografiýasy hem özüne çeker. Kitapda Magtymgulynyň eserlerinde gabat gelýän ýer-ýurt atlarynyň köpüsiniň manysy we çeperçilik ähmiýeti olaryň poetikasynyň üsti bilen açylyp görkezilýär.

«Magtymguly – ylham çeşmesi» atly göwrümli ýygyndyda şahyryň döredijiligi bilen baglanyşykly dürli meselelere we onuň hemmetaraplaýyn öwrenilmegine bagyşlanan ylmy makalalar jemlenipdir. Olarda nusgawy türkmen şahyrynyň şygryýetiniň ählumumy adamzat gymmaty, ynsanperwer manysy we çeper kämilligi açylyp görkezilýär.

Magtymguly Pyragynyň 300 ýyllygyna bagyşlanan «Beýik Magtymguly we türkmen durmuşy» atly başga bir makalalar ýygyndysy neşire Türkmenistanyň Ylymlar akademiýasynyň Taryh we arheologiýa instituty tarapyndan taýýarlanypdyr. Kitapda Magtymguly Pyragynyň ýaşan we döreden taryhy döwri, onuň paýhasly poeziýasynyň we ynsanperwer garaýyşlarynyň dünýäsi açylyp görkezilýär. Täze gözlegleriň esasynda şahyryň eserlerinde türkmen halkynyň ruhy dünýäsiniň we milli däpleriniň beýany görünýär.