Türkmenistanyň Daşary işler ministrliginiň Halkara gatnaşyklary institutynda tejribeli diplomatlary, ykdysatçylary, syýasatçylary, ylmy işleriň dürli ugurlaryndan alymlary, görnükli jemgyýetçilik işgärlerini we bilermenleri talyplar hem-de mugallymlar düzümi bilen duşuşmaga çagyrmak asylly däbe öwrüldi. Ýakynda daşary ykdysady işler ulgamynda ykdysatçy-bilermen, Türkmenistanyň at gazanan ykdysatçysy, dosent Täçmyrat Üwdiýew geljekki hünärmenler bilen duşuşmaga geldi.

Söhbetdeşligiň temasy «Türkmenistanyň ykdysady syýasatynda makroykdysady görkezijileriň ähmiýeti we eýeleýän orny» diýlip beýan edilendigine garamazdan, bilermeniň talyplar bilen gürrüňdeşligi döwletleriň arasyndaky daşary ykdysady gatnaşyklaryň häzirki şertlerinde möhüm bolup durýan ençeme beýleki ugurdaş temalary hem gurşap aldy.

Ykdysatçynyň sebitiň taryhy taýdan emele gelen şertleri bilen baglylykda aýdan nazary-ykdysady hasaplamalary diňleýjiler üçin aýratyn ýatda galyjy we täsirli boldy. Şoňa görä-de, elbetde, munuň özi talyplaryň öz gezeginde seslenmegine getirdi, olar hünärmene özlerini gyzyklandyrýan köp sanly sowallaryny berdiler.

Türkmenistanyň DIM-niň HGI-niň Strategik barlaglar ylmy merkeziniň duşuşyga gatnaşan işgäri Döwletmyrat Mämmedow we institutyň daşary ykdysady işler kafedrasynyň müdiri wezipesini ýerine ýetiriji Perhat Çaryýew öz çykyşlary bilen ara alnyp maslahatlaşylan meseleler boýunça talyplaryň düşünjeleriniň üstüni ýetirdiler.

Duşuşygyň ahyrynda talyplar bilermene eden çykyşy üçin hoşallyk bildirdiler hem-de onuň bilen ýene-de täze duşuşyklary arzuw etdiler.