S.A.Nyýazow adyndaky Türkmen oba hojalyk uniwersitetinde bu ýokary okuw mekdebiniň Türkmenistanyň umumy bilim berýän orta mekdepleriň 10-njy we 11-nji synp okuwçylarynyň arasynda geçirilen informatika boýunça olimpiadanyň birinji we ikinji tapgyrlarynyň netijeleri jemlenildi.

Iki tapgyryň jemi boýunça olimpiadanyň üçünji, döwlet tapgyryna gatnaşyjylaryň sanawy kesgitlenildi. Ýurdumyzyň dürli künjeklerinden üstünlikli çykyş eden, ýaryş meýdançasynda tapawutlanan we iň köp utuk toplan 86 okuwçy abraýly bäsleşige gatnaşmaga hukuk gazandy.

Olimpiadanyň birinji we ikinji tapgyrlary şu ýylyň 15-nji we 17-nji ýanwarynda paýtagtymyzyň, Arkadag şäheriniň hem-de ýurdumyzyň welaýatlarynyň orta we ýokary okuw mekdeplerinde onlaýn görnüşde geçirildi.

Olimpiadanyň jemleýji, üçünji tapgyry 15-nji fewralda S.A.Nyýazow adyndaky Türkmen oba hojalyk uniwersitetinde 10-njy synp okuwçylary we 16-njy fewralda 11-nji synp okuwçylary üçin olaryň özleriniň gatnaşmagynda geçiriler. Informatika ugrundan bilimi güýçlülere 7 meseläni çözmäge 200 minut wagt berler.

Bäsleşigiň ýeňijileri we onda degişli orunlary eýelänler degişli derejelerdäki medallar we diplomlar bilen sylaglanylar.

Çäräniň guramaçylary bilen: +993 12 34 26 80, +993 65 63 36 44; elektron poçta: tm.tau.2022@gmail.com. arkaly habarlaşyp bilersiňiz.

Informatika boýunça olimpiada informatika ugrundan ýaşlaryň bilim derejesini ýokarlandyrmak, takyk ylymlary öwrenmäge islegini höweslendirmek we goldamak, häzirki zaman sanly tehnologiýalary ulanyp bu ugurda özbaşdak işlemek üçin başarnyklaryny kemala getirmek we ösdürmek maksady bilen geçirilýär. 

Mundan başga-da, olimpiada has zehinli we başarjaň okuwçylary kesgitlemäge, şeýle hem maglumat-kommunikasiýa tehnologiýalary arkaly ýurdumyzyň ýokary okuw mekdepleri bilen orta mekdepleriň arasyndaky gatnaşyklary berkitmäge gönükdirilendir.