Türkmen döwlet neşirýat gullugynyň Neşirýat-çaphana orta hünär okuw mekdebinde şu ýylyň «Pähim-paýhas ummany Magtymguly Pyragy» şygaryna we Änew şäheriniň 2024-nji ýylda «Türki dünýäsiniň medeni paýtagty» bolmagyna bagyşlanan çäre geçirildi.

Tanymal medeniýet we sungat işgärleriniň, ylym hem-de Türkmenistanyň Taryhy we medeni ýadygärlikleri goramak, öwrenmek hem-de rejelemek baradaky milli müdirligiň wekilleriniň gatnaşmagynda talyplar üçin döredijilik duşuşygy guraldy. Bilim edarasynyň myhmanlary talyplara şu ýylyň möhüm wakalary, türkmen halkynyň taryhy-medeni mirasyny gorap saklamak we wagyz etmek boýunça alnyp barylýan işler barada gürrüň berdiler.

2023-nji ýylyň ahyrynda Türkmenistana «Beýik Ýüpek ýoly: «Zerewşan-Garagum geçelgesiniň» we «Turan aram guşagynyň çölleri» köptaraplaýyn ugrunyň ÝUNESKO-nyň Bütindünýä mirasynyň sanawyna goşulandygyny tassyklaýan şahadatnamalar dabaraly ýagdaýda berildi. Mundan başga-da, Änew şäheriniň 2024-nji ýylda «Türki dünýäsiniň medeni paýtagty» hasap edilmeginiň çäklerinde çäreleriň giň medeni maksatnamasy taýýarlanylýar.

– Türki medeniýetiň halkara guramasynyň (TÜRKSOÝ) 2024-nji ýyly «Türki dünýäsiniň beýik şahyry we akyldary Magtymguly Pyragynyň ýyly» diýip yglan etmegi aýratyn bellärliklidir. Häzirki wagtda ýurdumyzda türkmen edebiýatynyň beýik şahyrynyň doglan gününiň 300 ýyllygyna bagyşlanan ençeme çäreler geçirilýär. Okuwçylarymyzyň görnükli şahyryň we akyldaryň keşbini mümkin boldugyça giňden açmagy üçin Magtymguly Pyragynyň portretleriniň sergisini taýýarladyk we sungaty öwrenijileri hem-de nakgaşlary söhbete çagyrdyk – diýip, mugallym Jennet Karanow gürrüň berýär.

Türkmenistanyň sungatda at gazanan işgäri Saparmämmet Meredow ýaşlara Magtymguly Pyragynyň portretlerini çekmegiň inçe syrlary barada gürrüň berdi. Dürli döwürde nakgaşlar nusgawy şahyryň keşbini özüçe döretdiler. Emma Türkmenistanyň halk nakgaşy Aýhan Hajyýewiň eseri kanoniki portret hökmünde ykrar edildi. Nakgaşyň ýüz ýyllyk ýubileýi aprel aýynda ýurdumyzda giňden belleniler.

Türkmenistanyň at gazanan artisti Batyr Çaryýewiň Gahryman Arkadagyň «Pähim-paýhas ummany Magtymguly Pyragy» goşgusyny okamagy döredijilik duşuşygy bilen sazlaşykly utgaşdy.

Çäräniň ahyrynda Türkmenistanyň Taryhy we medeni ýadygärlikleri goramak, öwrenmek hem-de rejelemek baradaky milli müdirliginiň wekili Türkmen döwlet neşirýat gullugynyň Neşirýat-çaphana orta hünär okuw mekdebiniň kitaphanasyna «Asyrlaryň yzlary» halkara ylmy ýygyndysynyň ilkinji neşirini sowgat berdi.