Türkmenistanyň Oguz han adyndaky Inžener-tehnologiýalar uniwersitetiniň «Goşmaça we üznüksiz bilim» okuw merkezi giň gerimli ugurlar boýunça okajaklary tomusky okuwlara çagyrmagyny dowam edýär.
Merkez 15 ugur: mugallymçylyk işi we pedagogik tehnologiýalar, sanly ykdysadyýet, matematika, fizika, biologiýa, himiýa, iňlis dili, ýapon dili, rus dili, koreý dili, kompýuter sowatlylygy, programmalaşdyrmak, robot tehnikasy, kompýuter inženerçilik grafikasy we animasiýa, kiberhowpsuzlyk ugurlary boýunça okuwlary teklip edýär.
Merkez isleg bildirýänleriň ählisini bilim maksatnamasyny özleşdirmäge çagyrýar, ýaş boýunça çäklendirme ýok. Bu ýerde talyplar, mekdep okuwçylary üstünlikli okaýarlar, dürli ýaşdaky we hünärdäki hünärmenler hünär derejesini ýokarandyrýarlar. Matematika hem-de diller boýunça okuwlara çagalar 5 ýaşyndan kabul edilýär.
Okuwlar halkara ugurdaş olimpiadalaryň we hünär derejeli bäsleşikleriň ýeňijileri bolup durýan işjeň, tejribeli hem-de maksada okgunly mugallymlaryň ýolbaşçylygynda geçirilýär. Okuwlar innowasion usulyýetleriň we öňdebaryjy tehnologiýalaryň, şeýle hem halkara ölçeglerine laýyk gelýän okuw gollanmalarynyň ulanylmagy bilen amala aşyrylýar. Okuwlar tamamlanandan soň şahadatnama berilýär.
Merkeziň oňaýly we giň synp otaglarynda diňleýjileriň özlerini oňat duýmaklary hem-de okuw dersleriniň has netijeli bolmagy üçin hemme zerur şertler döredilendir.
Merkeziň 2 ýyldan az wagt mundan ozal, 2022-nji ýylyň sentýabrynda açylandygyna garamazdan, ol Aşgabadyň öňdebaryjy bilim merkezleriniň biri hökmünde eýeleýän ornuny berkitdi hem-de paýtagtyň myhmanlarynyň we ýaşaýjylarynyň arasynda meşhurlykdan peýdalanýar. Merkeziň ýokary bäsdeşlige ukyplylygy taýýarlygyň ugurlaryny saýlamaga giň mümkinçilikleriň bolmagy, okuwlaryň hili hem-de bahalaryň elýeterliligi bilen şertlendirilendir.
Mundan başga-da, merkeziň dolandyryjylary diňleýjileriň okuwlaryndan boş wagtlaryny ýakymly we peýdaly geçirmeklerini guramak dogrusynda-da alada edipdirler. Bu ýerde intellektual bäsleşikler, gyzykly oýunlar, dürli ýaryşlar yzygiderli geçirilýär hem-de ýola goýulan däbe görä, has işjeň gatnaşanlara we tapawutlananlara höweslendiriji baýraklar gowşurylýar.
Merkezde okuwlaryň ýylyň dowamynda alnyp barylýandygyny bellemek gerek. Diňleýjileri tomusky okuwlara jemlemek 10-njy iýuna çenli dowam eder. «Goşmaça we üznüksiz bilim» Okuw merkezi gyzyklanma bildirýänleriň ählisine Aşgabat şäheriniň Köşi köçesiniň 100-nji jaýy salgysy boýunça garaşýar. Habarlaşmak üçin telefon belgiler: (+993 64) 86 99 20; (+993 61) 01 22 83. Elektron salgy: gosmacaweuznuksizbilim@gmail.com.
