Türkmenistanyň Daşary işler ministrliginiň Halkara gatnaşyklary institutynyň uçurymy Serdar Rahymow GDA-nyň A.A.Gromyko adyndaky ýaş halkaraçylar bäsleşiginiň finalçylarynyň forumynda ýurdumyza wekilçilik etdi. Çäre 22-25-nji iýul aralygynda Moskwada geçirildi.
Çäre Russiýanyň, Belarusyň, Ermenistanyň, Gazagystanyň, Gyrgyzystanyň, Moldowanyň, Täjigistanyň, Türkmenistanyň we Özbegistanyň öňdebaryjy uniwersitetleriniň, akademiki institutlarynyň, döwlet häkimiýet edaralarynyň, jemgyýetçilik we işewürlik düzümleriniň wekillerini bir ýere jemledi.
A.A.Gromyko adyndaky daşary syýasat barlaglary assosiasiýasy, Russiýanyň DIM-niň MDHGI-i, RYA-nyň Ýewropa Instituty, Belarus Respublikasynyň Prezidentiniň ýanyndaky Dolandyryş akademiýasy bäsleşigiň guramaçylary bolup çykyş etdiler.
Forumyň dowamynda oňa gatnaşyjylara RYA-nyň Ýewropa Institutynyň direktory A.A.Gromyko, Russiýanyň Federasiýa Geňeşiniň halkara işler boýunça komitetiniň başlygynyň orunbasary A.A.Klimow, MDHGI-niň rektory, RYA-nyň akademigi, RYA-nyň Prezidiumynyň agzasy A.W.Torkunow, Russiýanyň DIM-niň resmi wekili, Russiýanyň DIM-niň Maglumat we metbugat departamentiniň direktory M.W.Zaharowa, Belarus Respublikasynyň Prezidentiniň ýanyndaky Dolandyryş akademiýasynyň rektory I.I.Buzowskiý we beýlekiler ýüzlendiler.
Çäräniň iş bölümleri esasy iki ýerde – RYA-nyň Ýewropa Institutynda hem-de Russiýanyň DIM-niň MDHGI-sinde geçirildi.
Forumyň çäklerinde finalçylar seljeriş häsiýetli işler bilen çykyş etdiler we daşary syýasat barlaglary assosiasiýasynyň kärdeşlerine hem-de bilermenlerine esasy tezislerini we iş tekliplerini görkezdiler.
Foruma gatnaşyjylar Russiýa Federasiýasynyň Daşary işler ministrligine baryp gördüler, şol ýerde GDA ýurtlarynyň Üçünji departamentiniň direktory A.W.Sternikow bilen duşuşyk geçirildi.
Medeni we bilim maksatnamasynyň çäklerinde Ýeňiş muzeýine gezelenç guraldy.
Şu ýyl bäsleşige GDA-nyň 10 ýurdundan 560-dan gowrak adam gatnaşdy. 50-den gowrak adama onuň final tapgyryna düşmek bagty miýesser etdi, şolaryň hataryna Serdar Rahymow girdi.
Türkmenistanyň DIM-niň HGI-niň uçurymy GDA-nyň A.A.Gromyko adyndaky ýaş halkaraçylar bäsleşiginiň finalçylarynyň forumynda Türkmenistana wekilçilik edip, «Hazar sebitiniň döwletleriniň daşary syýasat strategiýasynda energetika mümkinçiliginiň eýeleýän orny» diýen tema boýunça ylmy işini üstünlikli tanyşdyrdy.
Serdar Rahymowyň giň gözýetimli, örän zehinli we başlangyçlar bilen çykyş edýän ýetginjekdigini bellemek gerek. Ol Ýokary diplomatiýa mekdebiniň talyby bolmak bilen, okan ýokary okuw mekdebiniň ýolbaşçylarynyň hem-de mugallymlarynyň arasynda özüni hemişe gowy tarapdan görkezip, daşary ýurtlardaky ylym-bilim çärelerine ýurdumyza ençeme gezek mynasyp wekilçilik etdi. Serdar Rahymow döwlet, sebit we halkara derejeli dürli bäsleşikleriň hem-de olimpiadalaryň köp gezek ýeňijisi hem-de olara işjeň gatnaşyjy boldy.
2022-nji ýylda ol Türkmenistanyň ýaşlarynyň arasynda ylmy işleriň bäsleşiginiň ýeňijisi boldy, «GDA-nyň iň gowy ýaş alymy» diýen hormatly ada mynasyp boldy, 2023-nji ýylda bolsa, «GDA-nyň iň gowy talyby» diýen derejäni aldy.
Ýaş alym, diplomat gazananlary bilen çäklenmän ösmegini, bilimlerini we ukyplaryny kämilleşdirmegini uly höwes bilen dowam edip, Watanymyzyň abadançylygyna hem-de abraýynyň artmagyna mynasyp goşandyny goşmagy maksat edinýär.
