Ýurdumyzyň Lebap welaýatynda 2024-nji – «Pähim-paýhas ummany Magtymguly Pyragy» ýylynyň hasyly üçin 10 müň 200 gektar ýerde şaly ekilip, ondan 47 müň 400 tonna şaly hasylyny almaklyk göz öňünde tutulýar.

Munuň özi her gektaryň hasyllylygynyň 47 sentnere ýakyn boljakdygyny aňladýar. Öňde goýlan belent sepgide ýetmek maksady bilen welaýatyň şalyçylary häzirki günlerde hysyrdyly zähmeti talap edýän bu ekine agrotehniki kadalara laýyklykda hyzmat edip, tutanýerli zähmet çekýärler.

Welaýat boýunça şaly ekiljek ýerleriň öňünden kesgitlenilmegi we köp suw hem-de yzygiderli idegi talap edýän bu ekiniň ekişine taýýarlyk işleriniň göwnejaý alnyp barylmagy, ekişiň öz wagtynda guramaçylykly geçirilmegi şaly meýdanlarynda gyradeň we doly gögeriş gazanylmagyna ýardam etdi. Bu möhüm azyklyk ekinine ideg işleriniň dowamynda ekin meýdanlarynda suwuň zerur bolan derejesiniň saklanylmagy, ekine fosfor hem-de karbomid dökünleriniň öz wagtynda, ýeterlik mukdarda berilmegi, ekin meýdanlarynyň haşal otlardan arassalanmagy şalynyň kadaly boý almagyny üpjün edýär.

Meýilnama laýyklykda şu önümçilik ýylynda Saýat etrabynda 3 müň 140, Çärjew etrabynda 3 müň 80, şeýle hem Dänew etrabynda 2 müň 160 gektar ýere şaly ekilmegi, bu etraplaryň welaýatda bol şaly hasylyny almaklyga uly goşant goşýandyklarynyň subutnamalarydyr.

Häzirki wagtda şaly ekilen meýdanlarda alnyp barylýan işler, bu gymmatly azyklyk ekiniň gün-günden boý almagyny üpjün edýär. Bu bolsa, welaýatyň zähmetsöýer şalyçy daýhanlarynyň öňki ýyllarda bolşy ýaly şu önümçilik ýylynda hem şalynyň bol hasylyny alyp, öňde goýan arzyly maksatlaryna ýetjekdiklerine bolan ynamyňy has-da berkidýär.