19-21-nji sentýabry aralygynda türkmen wekiliýetiniň Hytaý Halk Respublikasynyň Şensi welaýatynyň Sýanýan şäherine sapary boldy, şol ýerde Oba we tokaý hojalygynyň Demirgazyk-Günbatar uniwersitetiniň şanly 90 ýyllyk senesi mynasybetli dabaraly çäreler geçirildi.
Baýramçylyk duşuşygy dünýäniň dürli ýurtlarynyň ýolbaşçylaryny, ýokary okuw mekdepleriniň mugallymlaryny, professorlaryny, ylmy işgärlerini bir ýere jemledi. Çärede biziň ýurdumyza Türkmenistanyň Oguz han adyndaky Inžener-tehnologiýalar uniwersitetiniň wekiliýeti wekilçilik etdi.
20-nji sentýabrda dünýäniň dürli künjeklerinden kärdeşleriniň gatnaşmagynda Hytaýyň 1934-nji ýylda esaslandyrylan Oba we tokaý hojalygynyň Demirgazyk-Günbatar uniwersiteti özüniň 90 ýyllyk şanly senesini uly dabara bilen giňden belledi.
Özüniň ýüz ýyla barabar taryhynda hytaý uniwersiteti ösüşiň ýokary derejesine ýetdi, akademiki toparlaryň arasynda abraý we hormat gazandy hem-de dünýä meşhurlygyna eýe boldy. Iň abraýly we öňdebaryjy uniwersitetleriň biri bolup, ol eýeleýän ornuny berkitmegini dowam etmek bilen ylmy barlaglar, suw, tokaý we oba hojalygyny ösdürmek, halkara ylym-bilim hyzmatdaşlygy ulgamynda uly üstünliklerini görkezýär.
Şanly senesi bellenilýän ýokary okuw mekdebiň hormatyna geçirilen çäreleriň çäklerinde Hytaýyň we daşary ýurtlaryň ýokary okuw mekdepleriniň rektorlarynyň forumy guralyp, onuň barşynda ylmy maslahatlar we söhbetdeşlikler geçirildi, öňdebaryjy tejribeler alşyldy we hünär taýdan pikir alyşmalar boldy, mundan beýläk-de özara gatnaşyk etmegiň geljegi uly ugurlary ara alnyp maslahatlaşyldy.
Hytaý ýokary okuw mekdebiniň şanly senesi mynasybetli maslahatyň we dabaranyň dowamynda Türkmenistanyň Oguz han adyndaky Inžener-tehnologiýalar uniwersitetiniň Umumy we amaly biologiýa institutynyň alym-sekretary Batyr Daňatarow çykyş etdi. Ol türkmen ýokary okuw mekdebiniň rektorynyň adyndan iň gowy arzuwlaryny beýan edip, hytaýly kärdeşlerine gutlag hatyny dabaraly gowşurdy.
Türkmen wekiliýetiniň sapary Türkmenistanyň Oguz han adyndaky Inžener-tehnologiýalar uniwersiteti bilen Hytaýyň Oba we suw hojalygynyň Demirgazyk-Günbatar uniwersitetiniň arasynda hyzmatdaşlyk etmek hakynda Ähtnamanyň çäklerinde amala aşyryldy.
Ikitaraplaýyn resminama laýyklykda, ýokary okuw mekdepleriň arasynda özara bähbitli we netijeli hyzmatdaşlyk ýola goýuldy, ylym we bilim, tehnologiýalaryň ösüşi we innowasiýalar babatda netijeli işler alnyp barylýar.
