Türkmenistanyň paýtagtynda 14 ýaşa çenli ýetginjekleriň arasynda tennis boýunça dowam edýän «Ashgabat Open 2024» halkara ýaryşynda gyzlaryň arasyndaky ýaryşlarda ähli baýrakly orunlar ugrunda türkmen tennisçileri bäsleşer.
Bu ýagdaý nobaty oýun gününiň netijeleri boýunça kesgitlendi, olara görä, çärýek finala ilkinji bäş san bilen bellenen Ilima Guseýnowa, Aýlar Kakabaýewa, Aýnur Annamyradowa, Näzli Hudaýgulyýewa, Sülgün Işangulyýewa, şeýle hem Safiýa Tribunskaýa, Jennet Orazalyýewa we Anna Ponýatowa dagy çykdy.
 |
 |
Gyzlaryň arasynda jübütleýin bäsleşikde, garaşylyşy ýaly, ýarym finala ilkinji bellenen dörtlük çykdy. Finala çykmak üçin ilkinji oýunda Ilima Guseýnowa bilen Aýlar Kakabaýewa Aýnur Agamyradowa we Jennet Orazalyýewa, ikinji oýunda bolsa özbek tennisçisi Safiýa Şaripowa bilen jübüt bolan Sülgün Işangulyýewa türkmen tennisçileri Aýnur Annamyradowa we Näzli Hudaýgulyýewa garşy oýnarlar.
 |
 |
Ýöne oglanlaryň arasyndaky bäsleşikde türkmen tennisçilerine çärýek finala çykan pakistanly Muhammet Usmani, Birleşen Arap Emirliklerinden Muhammet Al Aly, şeýle hem malaýziýaly Garet Lim Hao Zhe we Ýakob Wong dagy çynlakaý bäsdeşlik edýärler. Özi-de final näçe golaýlaşsa, meýdançalarda göreş şonça-da erjellik bilen dowam edýär.
Türkmen tennisçisi Eýýupbeg Atajanow bilen BAE-den gelen Muhammet Al Alynyň arasyndaky çärýek finala çykmak ugrundaky, dowamlylygy boýunça rekord goýan oýun munuň aýdyň subutnamasy boldy. Olar Olimpiýa şäherçesiniň Tennis toplumynyň merkezi meýdançasynda üç sagat diýen ýaly bäsleşdiler. Birinji döwürde Eýýupbeg Atajanow öňde barýardy – 4:2 hasabynda. Emma soň garşydaşyna iki döwde utmaga ýol berdi. Şeýle-de bolsa, birinji döwür biziň tennisçimiz ýeňiş getirdi – 6:4 hasabynda. Bu oýna köp güýç sarp eden, E.Atajanow ilki ikinji döwürde, soň üçünji, aýgytlaýjy döwürde-de asgyn geldi – 3:6, 2:6 hasabynda.
Kerimgeldi Welibegow meýdançada pakistanly Muhammet Usmana garşy oýnady. Olaryň oýny iki sagat töweregi dowam etdi. Birinji döwürde hasap pakistanlynyň peýdasyna 5:4 hasabyndaka, garşydaşlar bir döwi 15 minut töweregi oýnadylar. Özi-de biziň tennisçimiziň oýny iki esse köpdi we K.Welibegow oýnuň hörpüni üýtgetjek ýaly görünýärdi. Emma M.Usmani mert durup, ilki birinji döwürde, soň bolsa ikinjide-de utdy – 6:4, 6:3 hasabynda.
Türkmen tennisçilerinden ilkinji dört belgililer Emirhan Rüstemow, Süleýman Hudaýberdiýew, Ýunus Annamyradow we Aly Geldiýew çärýek finala çykdylar.
Oglanlaryň arasyndaky jübütleýin bäsleşikde ýarym finalçylar kesgitlendi. Finala çykmak üçin birinji oýunda türkmen tennisçileri Nazar Amangeldiýew we Kerimgeldi Welibegow dagy dördünji belgi astynda çykyş edýän Ýaroslaw Bobrowa (Gazagystan) we Muhammetsapa Serdarowa (Türkmenistan) garşy oýnarlar. Başga bir türkmen-malaýziýa ýarym finalda ikinji belgili Ýunus Annamyradow / Aly Geldiýew we Garet Lim Hao Zhe / Ýakob Wong finala çykmak üçin, ikinji mümkinçilik ugrunda bäsleşer.
«Ashgabat Open 2024» halkara ýaryşynyň 12 ýurtdan – Beýik Britaniýadan, Hindistandan, Eýrandan, Iordaniýadan, Gazagystandan, Malaýziýadan, Birleşen Arap Emirliklerinden, Pakistandan, Täjigistandan, Türkiýeden, Özbegistandan we Türkmenistandan türgenleriň gatnaşmagynda geçirilýändigini ýatladýarys.
