«Türkmentel – 2024» atly XVII halkara sergisine gatnaşan «Nokat kompýuter» hojalyk jemgyýeti Hytaýyň «Dahua» kompaniýasynyň resmi distribýutory hökmünde gazanan üstünliklerini görkezdi. Netijeli hyzmatdaşlyk Türkmenistanyň ykdysadyýetiniň dürli pudaklary üçin ýokary tehnologiýaly çözgütler bilen üpjün etmekde täze mümkinçilikler açdy.
Hyzmatdaşlygyň netijesinde «Nokat kompýuter» birnäçe taslamany üstünlikli durmuşa geçirdi. Ilkinji nobatda, bu bank edaralarynyň howpsuzlyk derejesini we netijeliligini has ýokarlandyran bank çözgütleriniň hem-de wideo gözegçilik ulgamlarynyň ornaşdyrylmagydyr.
Mundan başga-da, oba hojalygy pudagynda ýyladyşhana tehnologiýalaryna gönükdirilen taslama durmuşa geçirildi. Bu taslama agronomlara we dolandyryjylara ösümlikleriň ýagdaýyna hakyky wagtda gözegçilik etmäge we olaryň ösmegi üçin has oňaýly şertleri döretmäge mümkinçilik berýän uzakdan gözegçilik ulgamlaryny üpjün edýär.
Bilim pudagynda okuwy dolandyrmagy ýeňilleşdirmek üçin resminamalary dolandyrmak ulgamlary, şeýle hem okuwyň hilini ýokarlandyrmak we talyplaryň gatnaşygyny ýokarlandyrmak üçin interaktiw tagtalar girizildi. Ýagşygeldi Kakaýew adyndaky Halkara nebit we gaz uniwersitetinde bedeniň gyzgynyny kesgitleýän gözegçilik we elýeterliligi dolandyryş ulgamy (GEDU) girizildi.
Hyzmatdaşlyk geljekde ammarlary awtomatlaşdyrmak üçin IT çözgütlerini durmuşa geçirmek göz öňünde tutulýar.
– «Türkmentel – 2024» atly XVII halkara sergisine gatnaşmagymyz netijesinde müşderileriň talaplaryny gönüden-göni öwrenmäge mümkinçilik döretdi. Her bir ýurduň öz aýratynlygy bar, biz öz ugrumyzdan öňdebaryjy bolsak-da, hemişe ýerli bazardan gelýän pikirlerden ugur alýarys – diýip, «Dahua» kompaniýasynyň wekili Lo Teng gürrüň berdi.
Türkmen bazarynda 10 ýyldan gowrak wagt bäri işläp gelýän «Nokat kompýuter» hojalyk jemgyýeti kompýuter enjamlaryny we gurluşly kabel ulgamlaryny toplumlaýyn üpjün etmekde, şeýle hem komponentler, ulanylýan materiallar bilen üpjün etmekde, programma üpjünçiligini işläp taýýarlamakda, internet-saýtlary, goşundylary we telekeçilik amallaryny awtomatlaşdyrmakda ýeterlik tejribe toplady.
Swetlana Çirsowa
