Hytaýyň Makao we Mongoliýanyň ýygyndy toparlaryndan 2:1 hasabynda üstün çykyp, türkmen tennisçileri Isa-Taun (Bahreýn) şäherinde geçirilýän Dewisiň Kubogy ugrunda zolak ýaryşyna ýeňiş bilen başladylar.
Ildeşlerimiziň çykyş edýän Aziýa we Okeaniýa zolagynyň V toparynda dört toparça bölünen 15 topar, derejesini ýokarlandyrmak ugrunda göreşýär.
Türkmenistanyň milli ýygyndy topary, Filippinleriň, Hytaýyň Makao we Mongoliýanyň ýygyndy toparlary bilen birlikde ýaryşyň iň güýçli «B» toparçasyna düşdi.
Beýleki toparçalarda: «A» – Guam, Nepal, Bruneý; «C» – Demirgazyk Mariana adalary, Laos, Maldiw adalary, Butan; «D» – Bahreýn, Ýemen, Bangladeş, Täjigistan çykyş edýärler.
Toparçalaryň ýeňijileri ýaryşyň utulan-çykdy tapgyryna çykarlar, ýeňiji iki topar geljek ýyl Aziýa we Okeaniýa zolagynyň IV toparynda oýnamak hukugyny alarlar.
Dewisiň Kubogy ugrunda ýaryşda Türkmenistanyň ýygyndysyna: Ýuriý Rogusskiý, Meýlis Orazmuhammedow, Gurbanberdi Gurbanberdiýew, Hajymyrat Çaryýew wekilçilik edýärler. Toparyň kapitany Mirali Hasanow. Wekiliýetimiziň ýolbaşçysy Türkmenistanyň Tennis federasiýasynyň başlygy Eziz Döwletow.
Hytaýyň Makao topary bilen ilkinji duşuşykda Ýuriý Rogusskiý Çýon Ioý Touwy – 6:2, 6:3 hasabynda ýeňenden soň, türkmen topary 1:0 hasabynda öňe saýlandy. Ýekelikdäki ikinji oýunda Meýlis Orazmuhammedow Tan Kaýl Lok Inýudan – 2:6, 5:7 hasabynda ýeňilenden soň hasap 1:1 boldy. Jübütleriň oýny aýgytly boldy, birinji setde 6:4, ikinjisinde 0:2 hasabynda utulandan soň Makao topary oýny tamamlamakdan ýüz öwürdi we netijede oňa tehniki ýeňliş yglan edildi.
2021-nji we 2022-nji ýyllarda Dewisiň Kubogy ýaryşynda ildeşlerimiz Mongoliýanyň toparyny 3:0 hasabynda utupdylar, şu günki Hytaýyň Makao topary bilen oýun hem şol duşuşykdaky ýaly boldy. Ýekelikdäki birinji oýunda Ýuriý Rogusskiý Zolbadar Urnuhy – 6:2, 6:2 hasabynda utdy. Ikinjisinde Meýlis Orazmuhammedow Undrah Purewdorždan – 6:7, 6:0, 4:6 hasabynda ýeňildi. Jübütleriň üçünji duşuşygynda toparymyzyň liderleri birinji setde – 5:7 hasabynda Hatansuihu Batbaýardan we Undrah Purewdorždan utulsalar-da, indiki iki setde – 6:4, 6:2 hasabynda utup, ýaryşda ikinji gezek ýeňiş gazandylar.
Türkmen tennisçileri indi ilkinji iki duşuşygynda 3:0 hasabynda Mongoliýanyň we Hytaýyň Makao toparlaryny ýeňen Filippinleriň topary bilen duşuşarlar.
Türkmenistanyň tennisçileriniň 2004-nji ýyldan bäri Dewis Kubogy ýaryşynda çykyş edip gelýändigini ýatladýarys. 2012-nji ýylda Dohada (Katar) geçirilen IV toparçanyň zolak ýaryşynda ilkinji gezek utulan-çykdy tapgyra çykdylar, Aziýa we Okeaniýa zolagynyň III toparçasyna çykmaga hukuk ugrunda göreşde Kambojanyň toparyndan 0:3 hasabynda ýeňildi. 2013-nji ýylda BAE-de geçirilen ýaryşda ähli garşydaşlaryny ýeňip, ildeşlerimiz ilkinji gezek has ýokary derejeli toparça çykdylar. 2014-nji ýylda Tähranda geçirilen Dewisiň Kubogy zolak ýaryşynda Türkmenistanyň erkekler topary Birleşen Arap Emirlikleriniň wekillerini 2:1 hasabynda ýeňip, Aziýa we Okeaniýa zolagynyň III toparçasynda öz ornuny saklap galdy. Türkmen topary bu ýaryşlarda 2015-nji ýylda Kuala-Lumpurda (Malaýziýa) geçirilen Aziýa we Okeaniýa zolagynyň III toparlaýyn ýaryşynyň utulan-çykdy tapgyryna çykyp, iň gowy netijesini gazandy.
