Türkmen türgenleri Kazanda erkekleriň we zenanlaryň arasynda geçirilen guşakly göreş 22-nji dünýä çempionatynda dürli derejeli 9 medal gazandylar.

Russiýa Federasiýasynyň Tatarystan Respublikasynyň paýtagtynda geçirilen bäsleşige 35 döwletden 270 töweregi türgen gatnaşdy. Olar «Ak Bars» söweş sungaty köşgünde erkin we nusgawy ugurlarda iň güýçlüni kesgitlemek ugrunda bäsleşdiler.

Ýaryşlaryň ähli görnüşleriniň netijesine görä, ildeşlerimiz üç altyn, bir kümüş we bäş bürünç medal gazandylar.

Erkin usulda guşakly göreşde Abdyresul Durdyýew (62 kilograma çenli agram derejesinde), Annagurban Allaberdiýew (90 kilograma çenli) we Pälwan Gurbangeldiýew (100 kilograma çenli) ýokary derejeli baýraga mynasyp boldular.

Guşakly göreşiň nusgawy görnüşinde Nurmuhammet Baýdogdyýew (100 kilogramdan agyr) kümüş medal gazandy. Bürünç medallary bolsa erkin usulda – Aşyrmyrat Amandurdyýew (57 kilograma çenli), Mekan Nurberdiýew (68 kilograma çenli), Azymmuhammet Orazmuhammedow (75 kilograma çenli) we Nobatgeldi Nazarow (100 kilograma) gazandylar, nusgawy usulda bolsa Dawut Nazarow (100 kilogramdan agyr) bürünç medal eýeledi.

2023-nji ýylda Astanada (Gazagystan) geçirilen guşakly göreş boýunça dünýä çempionatynda türkmen pälwanlary 11 – 4 altyn, 4 kümüş we 3 bürünç medal gazandylar.