«Arkadag» futbol topary 27-nji tapgyryň wagty üýtgedilen oýnunda paýtagtymyzyň «Altyn asyr» toparyndan üstün çykmak bilen, Türkmenistanyň futbol çempionatynda otuzynjy ýeňşini gazandy – 4:0.

Aşgabadyň Büzmeýin etrabynda ýerleşýän «Sport toplumy» stadionynda geçirilen oýundan öň «Türkmenaragatnaşyk» agentliginiň toparynyň milli birinjilik ugrundaky bäsleşikde ikinji orny eýelemäge mümkinçiligi bardy. Şeýle-de bolsa, Wladimir Baýramowyň topary «Altyn asyr» toparynyň garşysyna dört sany jogapsyz pökgi geçirip, olary kümüş medala bolan soňky umydyndan, şonuň bilen birlikde-de, indiki möwsümde Aziýa Futbol Konfederasiýasynyň (AFK) bir ýaryşyna gatnaşmak hukugyndan mahrum etdi.

Bu oýundaky ähli pökgüler oýnuň birinji ýarymynda tora girizildi. Hasaby 7-nji minutda Şanazar Tirkişow açdy. Soňra 32-nji we 36-njy minutlarda Begenç Akmämmedow iki pökgi geçirdi. Ol 41-nji minutda 11 metrlik jerime urgusyndan üçünji pökgini-de geçirip bilerdi. Emma «Altyn asyr» toparynyň derwezeçisi B.Akmämmedowa muny etmäge ýol bermedi. Burçdan urlan urgudan bir minut soň, Didar Durdyýew topy kellesi bilen urup, hasaby gutarnykly kesgitledi – 4:0.

Şeýlelikde, «Arkadag» futbol topary Türkmenistanyň çempionatyndaky çykyşyny yzly-yzyna ikinji ýyl ýekeje utuk hem ýitirmän tamamlady. Döwlet ähmiýetli adybir «akylly» şähere degişli bolan bu topar şu ýylyň başynda ikinji gezek wagtyndan öň «Ýurduň çempiony» diýen ada eýe bolup, Türkmenistanyň Naýbaşy kubogyny aldy.

Ikinji orny bolsa ýaryşlar tamamlanmanka, «Ahal» futbol topary eýeledi. Ol «Arkadag» topary bilen bilelikde indiki möwsümde Türkmenistanyň adyndan AFK ýaryşlaryna gatnaşmaga hukuk gazandy.

Milli çempionatyň bürünç medaly, çempionatyň ahyryna çenli galan oýun sanyna garamazdan, «Altyn asyr» toparyň futbolçylaryna ýetdi.