Aşgabatda Halkara Bitaraplyk güni we Türkmenistanyň hemişelik Bitaraplygynyň 29 ýyllygy mynasybetli «Diplomatiýanyň altyn ýaýy» at bilen geçirilen ýaýdan ok atmak boýunça ýaryşyň jemi jemlendi.

Türkmenistanda ýerleşýän diplomatik wekilhanalaryň we halkara guramalaryň wekilleri sportuň gyşky oýun görnüşleri sport toplumynyň meýdançasyna ýygnandylar. 30-dan gowrak gatnaşyjy  ýeňiş ugrundaky göreşe höwes bilen girişdi. Mundan başga-da, olaryň köpüsi ýaýy ilkinji gezek atyp görýärdiler we  sportuň bu görnüşinden  tejribesi ýokdy.

Ýaryş başlamazdan ozal oňa gatnaşyjylar tejribeli mergenlerden az wagt hem bolsa ussatlyk sapagyny aldylar. Şondan soň “Iň mergen” diýen at üçin ýaryş başlandy.

Çekeleşikli bäsdeşlik netijesinde erkekleriň arasynda Russiýa Federasiýasynyň ilçihanasynyň ikinji sekretary Wadim Ýakowlew ýeňiji boldy, ol baş baýraga – «Altyn ýaýa» mynasyp boldy. Ikinji orny ABŞ-nyň ilçihanasynyň wekili Patrik Rýanke, üçünji orny BSG-niň adyndan çykyş eden Anton Gonçarok eýelediler.

Zenanlaryň arasynda ABŞ-nyň ilçihanasyndan Katrin Ford birinji, Koreýa Respublikasynyň Minkung Çaýe ikinji orny, bürünç medaly bolsa  ýaponiýaly Mihaiko Sasaki eýelediler.

Milli däp-dessurlara laýyklykda ýaýdan ok atmakda ussatlygyny görkezen tejribeli ýaýçylaryň görkeziş çykyşlary bäsleşigiň gyzykly pursatlaryndan biri boldy.

Baýrak gowşurylyş dabarasyndan soň ýeňijiler bu çäräni gurşap alan  agzybirligiň we dostlugyň ruhuny nygtap, şadyýanlyk we şatlyk ruhuny nygtaýan ýaýlardyr nyşan şekilli tort kesdiler.

Ýaryşa gatnaşanlar onuň guramaçylaryna – Türkmenistanyň Ýaýdan ok atmak boýunça  milli  federasiýasyna we Koreýa Respublikasynyň ilçihanasyna, şeýle hem ýaryşyň hemaýatkärleri — «Resmi kepil», «Arçalyk», «Ak Tam», «Wok», «Ugur Türkmenistan» kompaniýalaryna hoşallyklaryny  bildirdiler.