Türkmen küştçüleri Bangkokda mekdep okuwçylarynyň arasynda geçirilen Aziýa Birinjiliginde bäş medal gazandylar.

Taýlandyň paýtagtynda geçirilen bu ýaryşa 31 ýurtdan 7, 9, 11, 13, 15 we 17 ýaşa çenli 555 küştçi gatnaşyp, alty ýaş toparynda «Iň güýçli» diýen at ugrunda bäsleşdiler.

Ildeşlerimiz ilkinji iki kümüş medaly rapidde, ýagny çalasyn küştde eýelediler. Bu oýunda oýunçynyň her göçümi üçin 10 sekunt goşmak bilen, tutuş oýna 15 minut wagt berilýärdi. Bu üstünligi Maksat Öwlýägulyýew 9 ýaşa çenli oglanlar toparynda, 10 ýaşly Aýa Baýramowa bolsa 11 ýaşa çenli gyzlar toparynda gazandy.

Ildeşlerimiz ýene 2 kümüş we 1 bürünç medaly blisde, ýagny ýyldyrym çaltlygyndaky oýunda gazandylar. Oýnuň bu görnüşinde her göçüm üçin 2 sekunt goşmak bilen, tutuş oýna 3 minut wagt berilýär.

Iň kiçi, ýagny 7 ýaşdan uly bolmadyk ýaş toparynda kümüş medala Mary şäherindäki 25-nji orta mekdebiň okuwçysy Anna Çaryýewa mynasyp boldy. Ol mümkin bolan 9 utukdan 6,5 utuk toplap, gazagystanly ýeňiji Amaliýa Edreşowadan 2,5 utuk yza galdy, ilkinji üçlügiň soňky ornuny eýelän hindistanly Aaranýa R-den bolsa ýarym utuk öňe geçdi.

17 ýaşa çenli ýetginjekler toparynda çykyş eden Serdar Baýramow hem kümüş medal gazandy. Lebap küşt mekdebiniň bu okuwçysy ýaryşyň filippinli ýeňijisi, FIDE ussady Kristian Arka bilen deň utuk gazandy – 7,5, ýöne şahsy oýunda ýeňilmegi sebäpli, ikinji ýeri eýeledi. Ilkinji üçlügi mongoliýaly sportçy, liderlerden 1 utuk yzda galan FIDE ussady Ulzikhişig Khişigbat tamamlady.

Toparymyzdaky bäşinji medal, bu gezek bürünç medal 9 ýaşa çenli gyzlar toparynda çykyş edýän lebaply Dünýä Ruslanowanyň paýyna düşdi. Bürünç ugrundaky göreşde ol goşmaça görkezijileriň hasabyna hersi 6 utuk toplan beýleki dört küştçüden öňe geçdi. Bu toparda altyn medaly 100% netije bilen Divi Bijesh (Hindistan) gazandy, kümüş medaly bolsa ýeňijiden 1 utuk yzda galan wýetnamly Nguýen Thi Phuoň Anh aldy.

Ýaş türkmen küştçüleri Aziýa çagalar we ýaşlar Birinjiliklerinde yzly-yzyna iki ýyl medal gazanýarlar. Geçen ýyl Özbegistanda geçirilen mekdep küşt Birinjiliginde ildeşlerimiz 7 sany, şol sanda bir altyn medal gazanypdy.

Adaty wagt tutulyp oýnalýan Aziýa Birinjiligi barada aýdylanda bolsa, bu ýaryşda toparymyzdaky iň gowy netijeleri Çaryhekim Çaryýew (7 ýaşa çenli oglanlar – 10-njy ýer), Maksat Öwlýägulyýew (9 ýaşa çenli – 11-nji ýer), Alihan Batyrow (11 ýaşa çenli – 11-nji ýer), mümkin bolan 9 utukdan 6 utuk toplan Gurbanmyrat Rüstemow (15 ýaşa çenli – 8-nji ýer) we 5,5 utuk toplan Gülmira Seýilhanowa (17 ýaşa çenli – 8-nji ýer) dagy görkezdi.

Umuman, Aziýa çempionatlarynyň derejesi barada aýtmaly bolsa, olar eýýäm ähli yklymlardaky, şol sanda bu görkeziji boýunça soňky döwürde öňde bolan Ýewropadaky ýaryşlaryň arasynda-da iň güýçli hasaplanýar. Aziýa ýaryşlarynyň bu abraýy rus küştçüleri Aziýa küşt federasiýasyna geçeninden soň, hasam güýçlendi. Aziýa küştçüleriniň güýçli derejesine ýaňy-ýakynda Singapurda tamamlanan dünýä küşt täji ugrundaky ýaryş-da şaýatlyk edýär. Onda 18 ýaşly hindi grossmeýsteri Gukeş Dommaraju hytaýly 32 ýaşly grossmeýster Diň Liženi 7,5:6,5 hasabynda ýeňlişe sezewar edip, küşt taryhynda iň ýaş dünýä çempiony boldy.