«Arkadag» toparynyň futbolçylary möwsümiň dowamynda ilkinji gezek üç baýrak gazandylar. Milli çempionatyň altyn medallarynyň we Naýbaşy Kubogyň üstüne Türkmenistanyň Kubogy goşuldy, ol finalda ýurdumyzyň wise-çempiony we AFK-nyň Çempionlar ligasynyň ýaryşyna iki gezek gatnaşan «Ahal» toparyny 1:0 hasabynda utdy.

Duşuşyk «Aşgabat» köpugurly stadionynyň merkezi meýdançasynda geçirildi.

Dört gezek ikinji derejeli topar kubogyny eýelän «Ahal» topary üçin bu duşuşyk ýaryşyň taryhynda eýýäm sekizinji finaldy. 2023-nji ýylyň aprelinde döredilen «Arkadag» topary üçin bolsa ikinjidi.

Finala barýan ýolda «Ahal» topary «Köpetdag» toparyny (öz meýdançasynda 2:1 we myhmançylykda 3:3 hasabynda) ýeňdi we iki gezek «Altyn asyr» toparyndan 3:0 hasabynda tehniki ýeňiş gazandy. «Arkadag» topary çärýek finalda (öz meýdançasynda 3:0 we myhmançylykda 3:1 hasabynda) Türkmenbaşynyň «Şagadam» toparyny ýeňdi, ýarym finalda bolsa Balkanabadyň «Nebitçi» toparyny (öz meýdançasynda 5:2 we myhmançylykda 7:2 hasabynda) utdy.

Kubok duşuşygyndan öň «Arkadag» bilen «Ahal» topary şu möwsümde bäş gezek özara güýç synanyşdylar. «Arkadag» topary bäş duşuşygyň hemmesinde: Türkmenistanyň çempionatynda 4:1, 4:0, 5:1, 2:1 – we ýurdumyzyň Naýbaşy Kubogy ugrundaky duşuşykda 3:1 hasabynda ýeňiş gazandy.

2024-nji ýyldaky Türkmenistanyň Kubogy ugrunda ýaryşyň soňky duşuşygy dartgynly boldy. Onuň ykbalyny birinji ýarymyň ahyrynda geçirilen ýeke-täk pökgi kesgitledi. 45-nji minutda Begmyrat Baýew çep gyradan topy Begenç Akmämmedowa geçirdi, olam jerime meýdançasynyň daşyndan pökgüni zarply urgy bilen tora saldy.

Duşuşygy ýeňişli tamamlan «Arkadag» toparynyň futbolçylary bu möwsümde üçünji baýragyny gazandylar. Döwlet derejeli şäheriň toparyny bu üstünlige Türkmenistanyň milli ýygyndysynyň ozalky tanymal hüjümçisi, 2003-2004-nji ýylyň möwsüminde Groznynyň «Tereka» toparynyň düzüminde Russiýanyň Kubogynyň we 2013-nji ýylda «Balkan» toparynyň hatarynda AFK-nyň Prezidentiniň Kubogynyň eýesi 44 ýaşly baş tälimçisi hökmünde Wladimir Baýramow getirdi.