Halkara Nowruz gününiň öňüsyrasynda Maýa Kulyýewa adyndaky Türkmen milli konserwatoriýasynda Nury Muhyýewiň dirižýorlyk etmeginde kamera orkestriniň konserti boldy. 2025-nji ýylyň «Halkara parahatçylyk we ynanyşmak ýyly» diýlip atlandyrylýandygyny göz öňünde tutup, konsert maksatnamasyna türkmen we daşary ýurtly kompozitorlaryň eserleri girizildi.

Konsert çeh kompozitory Eduard Naprawnikiň «Melanholiýa» atly eseri bilen açyldy. Oňa Nury Muhyýýew dirižýorlyk etdi. Kompozitoryň gyş möwsümi bilen hoşlaşýan ýaly oýa batan mylaýym sazyndan soň Baýram Hudaýnazarowyň «Ýylgaýlar» eseri ýerine ýetirildi. Milli türkmen sazy çeh sazyndan tapawutly kabul edildi.

Orkestr Çary Nurymowyň «1-nji dessan konsertini» ýerine ýetirende bu duýgy hasam güýçlendi. Üýtgeşik wakalary beýan edýän ajaýyp saz tomaşaçylaryň ünsüni özüne çekdi. Talyp Kowus Bäşimow dirižýorlyk etmeginde Nepes Jumageldiýewiň (fleýta) we Kuwwat Orazowyň (goboý) çalan sazy tomaşaçylaryň hoşallygyna mynasyp boldy.

Ýene-de başga bir medeniýetiň, başga bir döwrüň sazy ýaňlandy. Pýotr Ilýiç Çaýkowskiýniň «Ýewgeniý Onegin» operasyndan trombon we orkestr üçin sýuita ýerine ýetirildi. 

Ýene Çaýkowskiniň sazy soňky çykyşy diýlip yglan edildi. Skripka we orkestr üçin konserti halkara bäsleşikleriniň ýeňijisi Aýbölek Muhyýewa ýerine ýetirdi. Oňa ýene-de Nury Muhyýew dirižýorlyk etdi. Aýbölek iň çylşyrymly sazy ussatlyk bilen ýerine ýetirip, tomaşaçylaryň ünsüni özüne çekdi.

Orkestriň sazandalary we solistleri tomaşaçylara Nowruz baýramyna ýakymly sowgat etdiler.