Şensi welaýatynyň Sian şäherinde Hytaýda geçirilýän Türkmenistanyň Medeniýet ýylynyň çäklerinde ýurdumyzyň sungat ussatlarynyň konserti uly üstünlik bilen geçirildi. Hytaýda geçirilen çärelere gatnaşyjylaryň biri – Magtymguly adyndaky milli sazly drama teatrynyň çeper ýolbaşçysy Myrat Aradowdan döredijilik saparyndan galan täsirler barada gürrüň bermegini haýyş etdik. 

– Konsert zalynyň eýwanynda türkmen artistleriniň wekiliýeti Türkmenistan barada fotosurat sergisini gurady. Hytaýly tomaşaçylar biziň ýurdumyz, ak mermere beslenen paýtagtymyz, täze Arkadag şäheri we beýleki gözel ýerlerimiz hakynda gürrüň berýän fotosuratlara uly gyzyklanma bilen syn etdiler. Monitorda ýurdumyzyň köp ugurlarda gazanan ykdysady üstünlikleri görkezildi. 

Şeýle suratlar we maglumatlar konserte giriş boldy, ony «Dehistan» folklor-etnografik topary açdy. Çykyşlaryň dowamynda hytaýly tomaşaçylar milli lybaslar, türkmen halkynyň toý dabaralary we dostlukly, parahatçylygy söýýän ýurduň meşhur watançylyk hem liriki aýdymlary bilen tanyşdylar.

Konsertde türkmen halkynyň Milli Lideri, Halk Maslahatynyň Başlygy Gahryman Arkadagymyzyň «Ýaşasyn parahat durmuş» we Magtymguly Pyragynyň sözlerine kompozitor Weli Muhadowyň döreden «Uýat eýleýir», «Garlawaç» aýdymlary ýaňlandy.

Türkmenistanyň halk artisti Atajan Berdiýew «Ene» atly aýdymyny hytaý dilinde ussatlarça ýerine ýetirdi. Aýdym ýaňlanýan pursatda görkezilen wideoşekilde enäniň elinde Ýer şarynyň şekillendirilmegi tomaşaçylarda üýtgeşik täsir döretdi. Türkmen aýdymçysynyň çykyşyny tomaşaçylar şowhunly el çarpyşmalar bilen mübäreklediler.

Halk saz gurallary – dutarda we doýrada ýaryş guran iki sazanda Myrat Aşyrowyň we Sarwar Sabirowyň çykyşy uly üstünlik gazandy. Çykyş wagty «Şükür bagşy» atly filminden parçalar görkezildi.

Konsertde Myrat Aradowyň ýanynda Şensi welaýat halk hökümetiniň gubernatorynyň orunbasary oturdy. 

Myrat terjimeçiniň kömegi bilen :

– Indi sazyňyzy dilimizde ýerine ýetireris – diýdi.

... Ilki bilen arakesme boldy, soňra hytaý sazy tüýdükde ýerine ýetirilmeginde mylaýym ýaňlanyp başlady, soň saksafonyň agras sazy ony dowam etdi we bu saz gyjagyň mymyk owazy bilen jemlendi. Bu çykyşy Kakajan Hudaýberdiýew taýýarlady.

Konsert ÝUNESKO-nyň Adamzadyň maddy däl medeni mirasynyň sanawynda möhüm orun eýelän «Küştdepdi» milli tansy bilen tamamlandy. 

Konserte gatnaşyjylaryň hemmesi tomaşaçylara hoşallyk bildirmek üçin sahna çykdy, olaryň arasynda aýdymçy Aky Ýagşygeldiýewa, Munisa Hudaýbergenowa, Gurbangylyç Nurgylyjow we beýlekiler bardy.

Türkmen sazandalarynyň we artistleriniň çykyşlaryndan soň Türkmenistan bilen Hytaý biri-birine has ýakynlaşdy.