Türkmenistanyň futbol boýunça 17 ýaşa çenli ýetginjekler ýygyndy topary (U17) Daşkentde tamamlanan Merkezi Aziýa Futbol assosiasiýasynyň (CAFA) çempionatynda 3-nji orun ugrundaky oýunda Gyrgyzystanyň toparyny ýeňip, bürünç medala eýe boldy.
Bäsleşige birinji tapgyrda iki topara bölünen 6 ýurtdan wekiller gatnaşdy. Ilkinji oýunda owganystanly oglanlary 1:0 hasabynda ýeňip, Täjigistandaky deň-duşlaryndan 1:4 hasabynda ýeňlişe sezewar bolan türkmen futbolçylary «B» toparçada 3 utuk bilen ikinji orny eýeledi.
Bürünç medal ugrundaky bäsdeşi Gyrgyzystanyň topary hem «A» toparçada Özbegistandan 1:5 hasabynda utulyp, Eýranyň wekillerini 4:3 hasabynda ýeňip, 3 utuk bilen ikinji orny eýeledi.
3-nji orun üçin oýnuň esasy wagty 0:0 hasabynda deň tamamlandy. Duşuşykdan soňky 11 metrlik jerime urgulary watandaşlarymyz üçin şowly başlandy. Gyrgyz toparynyň 11 metrlik ilkinji urgusyny duşuşygyň iň gowy oýunçysy diýlip ykrar edilen Türkmenistanyň milli ýygyndysynyň derwezebany Azym Abaýew tutmagy başardy.
Soňra iki toparyň oýunçylary soňky, bäşinji tapgyra çenli yzygiderli pökgi geçirdiler, onda türkmen oýunçysynyň aýgytlaýjy urgusyny gyrgyz toparynyň derwezebany gaýtardy. Şondan soň toparlar säwliksiz urmaly boldular. Bu ýerde hem türkmen topary özüni has gowy ele aldy, derwezeban Azym Abaýew üçünji goşmaça tapgyrda topy yzyna gaýtardy we toparyna 7:6 hasabynda ýeňiş getirdi.
Şeýlelikde, Türkmenistanyň ýaşlar futbol topary (U17) ilkinji gezek CAFA çempionatynda bürünç medala eýe boldy. Topar bu üstünlige baş tälimçi Ahmet Allaberdiýewiň ýolbaşçylygynda ýetdi.
Dartgynly final oýunda meýdança eýeleri özbegistanly futbolçylary garaşylmaýan ýerden erjellik bilen 4:3 hasabynda utan Täjigistanyň ýygyndysy ýaryşda ýeňiş gazandy. Ýogsa, täjigistanlylar oýnuň dowamynda ilki 0:2, soňra 2:3 hasabynda utulýardy. Ýöne goşmaça wagtda – 95-nji minutda 2:2 hasabynda ýagdaýy deňledi. Hasap 2:3 wagty 97-nji minutda Kamron Karimzoda hasaby 3:3 etdi.
Duşuşygyň ykbaly 120-nji minutda, oýun gutarmagyna 29 sekunt galanda çözüldi, Mehrubon Odilzoda 30-32 metr aralykdan topy depip, Özbegistanyň ýygyndysynyň derwezesine ikinji goluny geçirip, toparynyň ýaryşyň çempiony diýen ada eýe bolmagyna sebäp boldy.
Bäşinji-altynjy orun ugrunda oýunda eýranly ýetginjekler owganystanly deň-duşlaryndan 3:1 hasabynda üstün çykdylar.
