Türkmenistanyň Daşary işler ministrliginiň ýardamy we ýurduň Hazar deňiz institutynyň, şeýle hem Halkara ummanlar institutynyň guramaçylyk goldawy bilen iýul aýynyň 14–25-i aralygynda Arçabil myhmanhanasynyň mejlisler zalynda Hazarýaka bäş döwletiň wekilleri üçin «Hazar deňzi – durnukly ösüş we dolandyryş» atly halkara okuw geçirilýär. Däp boýunça, okuwa gatnaşmak üçin hünär ugry deňiz ylmynyň dürli taraplary bilen baglanyşykly mugallymlaryň giň topary çagyrylýar.

Okuwa gatnaşýan wekiliýetleriň düzümine Waleriý Dewýatkow (Russiýa Federasiýasynyň ilçihanasy), Mojtäba Gafouri we Wahid Heýrabadi (Eýran Yslam Respublikasynyň Aşgabatdaky ilçihanasynyň düzüm bölegi, şeýle hem EYR-iň Tebigaty goramak guramasy), Nurdawlet Ýerezhepow (Gazagystan Respublikasynyň Daşary işler ministrliginiň halkara hukugy bölüminiň hünärmeni), şeýle hem Ýeldäniz Wäliýew we Goçak Kämalzadä (Azerbaýjan Respublikasynyň Sanly ösüş we ulag ministrligi we Döwlet deňiz portunyň gullugy) dagy girýär.

Hazar meseleleriniň giň gerimini öz içine alýan okuwlara biziň ýurdumyzdan «Türkmengaz», «Türkmennebit» we «Türkmengeologiýa» döwlet korporasiýalary, Türkmenistanyň Adalat, Daşky gurşawy goramak (onuň düzümleri bolan «Türkmengidromet»), Maliýe we ykdysadyýet ministrlikleri gatnaşýar.

Bu okuw bilim, tejribe, gidrometeorologiýa boýunça maglumatlary, tebigat goragy, ykdysady, syýahatçylyk meselelerinde bilelikdäki hereketini, şeýle hem hyzmatdaşlygy ösdürmegi öz içine alýar. Hazarýaka döwletleriň özara hyzmatdaşlygynyň adaty bir bölegine öwrülen şunuň ýaly çäreleriň maksady özara düşünişmegi berkitmek, ylmy aragatnaşyklary ösdürmek üçin esas döretmek, deňizde hojalygy dolandyrmagy meýilnamalaşdyrmagyň binýadyny döretmekde, onuň baý tebigy baýlyklaryny işlemekde we deňiz gurşawynyň ekologiýasyny goramakda birleşmegiň zerurdygyna düşünmekdir.

Okuwa gatnaşýanlar üçin okuw günleri göz öňünde tutulypdyr, çekişmeler, pikir alyşmak, sorag-jogap görnüşinde gatnaşyk, özbaşdak iş döwürleri we medeni maksatnama üçin wagt bölünip berlipdir.