Türkmenbaşy şäheriniň «Şagadam» futbol topary Balkanabatda tamamlanan bir aýlawly futbol boýunça Balkan welaýatynyň Kubogyny eýeledi.

Bäş topar abraýly baýrak ugrunda bäsleşdiler. Olardan ikisi – «Şagadam» (Türkmenbaşy) we «Nebitçi» (Balkanabat) ýokary ligada çykyş edýärdi, galany – «Nebitçi-2» we «Galkynyş» (ikisi hem Balkanabatdan) we «Çarlakly ýoly» (Hazar) höwesjeň klublardy.

Jemleýji tapgyra diňe iki topar – «Şagadam» we «Nebitçi» utuk ýitirmän çykdy. Olaryň duşuşygynda baş baýragyň eýesi kesgitlenildi.

Oýnuň birinji ýarymy toparlaryň hiçisine üstünlik getirmedi. 57-nji minutda Saýat Gulyýew 11 metrlik jerime urup, «Nebitçini» öňe çykardy – 1:0. 71-nji minutda Farhat Italmazow hasaby deňledi, 83-nji minutda «Şagadamyň» oýunçysy Akmämmet Metdäýew hasaby 2:1 ýetirdi. Bu ýeňiş Balkan wealýatynyň Kubogynyň eýesini belli etdi.

Türkmenbaşydaky nebiti gaýtadan işleýän zawodlar toplumynyň topary bu ýeňşe baş tälimçi Hojaahmet Arazow ýolbaşçylygynda ýetdi.

Ikinji we üçünji orny degişlilikde «Nebitçi» (9 utuk) we «Nebitçi-2» (2 utuk) eýelediler.