Futbol boýunça Mary welaýatynyň Kubogynyň ugrunda finalda ýokary liganyň «Merw» we «Energeik» toparlary güýç synanyşarlar. Bu ýarymfinal duşuşyklarynyň netijeleri boýunça belli boldy ‒ olarda finala çykanlaryň ikisi-de uly ýeňiş gazandy.

Birinji ýarymfinalda «Merw» «Olimpi» 5 : 0 hasabynda utdy. Toplary Mukam Nazzyýew (6-njy minutda), Myrat Aşyrow (25-nji minutda), Toýly Goçnazarow (40-njy), Begenç Alamow (51-nji minutda jerime urgusyndan) we Merdan Işangulyýew (69-njy minutda) öz adyna ýazdylar.

Ikinjide bolsa «Energetik» hut şu hasap bilen «Kuwwaty» ýeňdi. Ýeňiji topardan Guwanç Ýagmyrow iki top (8-nji we 73-nji minutlarda), Perman Hallyýew (23-nji), Süleýman Mirzoýew (49) we Mekan Çaryýew (70-nji minutda) dagy bolsa bir topdan geçirdiler. 

Jemleýji oýun 28-nji maýda Marynyň «Sport toplumy» stadionynda geçiriler.