Ýarym final duşuşyklarynyň netijesi boýunça «Ahal» we Türkmenbaşy şäherinden «Şagadam» klublarynyň Türkmenistanyň Futbol federasiýasynyň kubogy-2022 baýragy ugrunda bäsleşjekdigi aýan boldy.

«Ahal» topary Arslanmyrat Amanowyň (37-nji minutda) we Arzuwguly Sapargulyýewiň (89-njy minutda) dürs urgylary bilen «Aşgabat» toparyny 2:0 hasabynda utdy.

«Şagadam» bilen Balkanabadyň «Nebitçisiniň» duşuşygynda oýnuň esasy wagty 0:0 hasabynda deň tamamlanandygy sebäpli, ýeňijini 11 metrlik urgulary arkaly kesgitlemeli boldy. Onda «Şagadamyň» futbolçylary urgylary dürs urup, 4:1 hasabynda ýeňiş gazandylar.

Geçen möwsümde «Ahal» Türkmenistanyň çempionatynda 2-nji, «Şagadam» 3-nji orny eýeläpdiler.

3-nji orun ugrunda «Aşgabat» bilen «Nebitçi» duşuşar.

Geçen ýyl «Aşgabat» 3-nji orun ugrundaky duşuşykda Marynyň «Energetigini» 1:0 hasabynda utup, bürünç baýraga mynasyp bolupdy.

Geçen ýyl finalda «Merwi» 1:0 hasabynda utan «Ahalyň» Türkmenistanyň Futbol federasiýasynyň kubogynyň häzirki eýesidigini ýatladýarys.