Täjigistanda dowam edýän Merkezi Aziýa futbol assosiasiýasynyň (CAFA) zenanlar milli toparlarynyň arasynda geçirilýän birinji çempionatynda Türkmenistan bilen Gyrgyzystanyň oýny utuksyz tamamlandy.
Bu iki toparyň hem çempionatda ikinji oýny boldy. Birinji tapgyrda ildeşlerimiz täjigistanly garşydaşlary bilen 1:1 hasabynda deň oýnadylar, gyrgyzystanly futbolçy gyzlar bolsa eýranlylardan 0-1 hasabynda utuldylar.
Türkmenistan bilen Gyrgyzystanyň Duşenbäniň Merkezi respublikan satdionynda geçen oýnunda ýiti pursatlar beýle köp bolmady. Bu duşuşykda gyrgyzystanly gyzlar biziň toparymyzyň derwezesiniň öňünde iki gezek howply pursat döretdiler. Birinji ýagdaýda oýnuň 72-nji minutynda Kamil Mingazowyň şägirtlerini derwezäniň sütüni halas etdi. Ikinji gezekde, goşmaça berlen wagtyň 92-nji minutynda bolsa gol salmagyň ajaýyp mümkinçiligini oýnuň ikinji ýarymynda oýna giren Žibbek Kanatbekowa ulanyp bilmedi. Jemleýji jürlewüge birnäçe sekunt galanda, ol derwezeçi bilen ýeke-ýekä çykdy, emma ondan geçip bilmedi. Merjen Bagşyýewa urgyny serpikdirdi we öz toparyna ýaryşda ikinji deň oýny getirdi.
Iki tapgyrdan soň Türkmenistanyň ýygyndysy 2 utuk gazanmak bilen, toparda üçünji orunda durýar. Birinji iki orny 3 utugy bolan eýranly we özbegistanly futbolçylar paýlaşýarlar. Gyrgyzystan bilen Täjigistanyň her birinde 1 utuk bar.
Özbegistanly oýunçylar ikinji tapgyrda Täjigistanyň ýygyndysyny 6:0 hasabynda utup, ýaryşy üstünlikli başladylar. Ýeňijileriň düzüminde Nilufar Kudratowa üç gol saldy (11-nji, 34-nji we 41-nji minutlar). Ilwina Ablýakimowa öz hasabyna iki utuk ýazdy (9-njy we 25-nji minutlar). Ýene bir goly Zarina Mammatkarimowa geçirdi (65-nji minutda).
Özbegistan bilen Täjigistanyň ýygyndy toparlarynyň arasyndaky oýna FIFA-nyň emini türkmenistanly Resul Mämmedowyň eminlik etmegi bellärliklidir. Ýene bir ildeşimiz Akmyrat Gurbanow bolsa onuň kömekçisi boldy.
Merkezi Aziýa futbol assosiasiýasynyň (CAFA) milli zenanlar ýygyndy toparlarynyň arasyndaky çempionatynyň indiki, üçünji tapgyrynyň oýunlary 14-nji iýulda bolar. Şol gün Türkmenistanyň ýygyndysy Özbegistanyň topary bilen oýnar, eýranly futbolçy gyzlar bolsa täjigistanly garşydaşlary bilen duşuşarlar.
CAFA çempionaty aýlaw ulgamy boýunça bir aýlawda geçýär. Ýeňiji topar gazanan utuk sany boýunça kesgitlener.
