Türkmenistanyň milli ýygyndy toparynyň woleýbolçylary Bişkekde geçirilýän Merkezi Aziýanyň kubogy ugrundaky bäsleşikde  ýer eýelerinden, ýagny Gyrgyzystanyň toparyndan bäş tapgyrda 3:2 hasabynda üstün çykyp, ikinji ýeňşini gazandy.

Abraýly baýragk ugrunda Gazagystanyň, Gyrgyzystanyň, Türkmenistanyň we Özbegistanyň erkekler ýygyndy toparlarynyň bäsleşýändigini ýatladýarys.

Ilkinji duşuşykda ildeşlerimiz çekeleşikli bäsleşikde 3:2 hasabynda  Gazagystandan üstün çykypdy – (19:25, 20:25, 25:21, 25:22, 15:13).

Gyrgyzystanyň milli ýygyndysy bilen geçirilen oýun hem ýeňil düşmedi. Ilkinji tapgyr türkmen woleýbolçylarynyň peýdasyna boldy – 28:26. Ikinji tapgyrda garşydaş topar utmagy başardy – 25:17. Üçünji döwde bolsa Türkmenistanyň topary ýeňiş gazanyp (25:21), ýene-de öňe saýlandy – 2:1. Emma dördünji tapgyrda gyrgyzystanlylar üstün çykyp, (25:23)  hasaby deňlediler – 2:2. Duşuşygyň ykbaly jemleýji tapgyrda çözüldi – onda türkmen topary rüstem çykdy – (15:8).

Ikinji tapgyryň başga bir oýnunda Gazagystan Özbegistandan üç döwde ynamly üstün çykyp (3:0), ilkinji ýeňşini gazandy.

Şeýlelikde, iki tapgyrdan soň Gazagystanyň, Gyrgyzystanyň we Türkmenistanyň toparlarynyň hersi 4 utuk toplady. Ýaryş tertibiniň ahyrynda Özbegistanyň topary barýar.

Üçünji tapgyrda ildeşlerimiz özbegistanly garşydaşlary bilen, Gazagystanyň we Gyrgyzystanyň ýygyndy toparlary bolsa öz aralarynda oýnarlar.

Merkezi Aziýanyň kubogy ugrundaky bäsleşigiň  ýeňijisi 27-nji iýulda belli bolar.