Oguzhan adyndaky «Türkmenfilm» birleşiginiň üç filmi - Arslan Eýeberdiewiň «Istärin», Sahysalyh Baýramowyň «Gyzyl kürte» we Hekim Alowowyň «Gyzyl alma» filmleri «2023-nji ýylda Yýjonbudaky Merkezi Aziýa filmleri festiwalyna» gatnaşmak üçin Koreýa Respublikasyna iberildi.

Festiwal 28-29-njy aprelde Kýongido welaýatynyň Yýjonbu şäherinde geçiriler. Koreýanyň köpçülikleýin habar beriş serişdeleri geljekki çäre barada Yýjonbu şäheriniň Şinhan uniwersiteti bilen bilelikde guran bu kinofestiwalynyň Merkezi Aziýa ýurtlaryndan halkara derejesinde ünsi özüne çekýän, ýöne Koreýada tanalmaýan filmleri görkezmek üçin meýdança boljakdygyny ýazýarlar.

Filmler Şinhan uniwersitetiniň gimnaziýasynda we ýerli kinoteatrlarda (CGV Uijeongbu, Megabox Millak) görkeziler. 28-nji aprelde Şinhan uniwersitetinde festiwalyň açylyş dabarasy bolar.

29-njy aprelde Merkezi Aziýanyň bäş ýurdunyň - Türkmenistanyň, Gazagystanyň, Gyrgyzystanyň, Täjigistanyň we Özbegistanyň hem-de ýörite çagyrylan üç ýurduň - Azerbaýjanyň, Mongoliýanyň we Indoneziýanyň filmleri görkeziler. Bu ýurtlaryň kinematografistleri dürli žanrlardan iň gowy işlerini, şol sanda ýaňy-ýakynda Koreýanyň Pusan şäherinde geçirilen Halkara kinofestiwalyna gatnaşan filmleri görkezerler. Filmler mugt görkeziler.