Bütindünýä jaz güni mynasybetli paýtagtymyzdaky Magtymguly adyndaky milli sazly-drama teatrynda konsert geçirildi. Onda Türkmenistanyň sungatda at gazanan işgäri Röwşen Nepesow we jaz orkestriniň sazandalary çykyş etdiler.

Konsert Röwşen Nepesowyň döreden «Awaza» eseri bilen başlandy. Sazyň ilkinji owazlary diňleýjileri Hazaryň ajaýyp kenaryndaky aladasyz dynç alyş älemine geçirdi.

Rejep Allaýarowyň «Gündogar fantaziýasy» jazda özboluşlylyga orny bardygyny görkezýän kimin ýeňil we hoş owaz ýaňlandy.

Aýdymçy Selim Gurbansähedow jazmenleriň repertuaryndan iň meşhur eserleriň biri «Sway» kompozisiýasyny ýerine ýetirdi.

Röwşen Nepesow her gezek konsert berende tomaşaçylara täze eserini hödürleýär. Bu gezek kompozitor «Serwi» atly eseriniň ilkinji ýetiren ýetirilişini ussat skripkaçy Bahram Dolyýewe ynandy. 

Konsert jaz diline geçirilen meşhur «Kuştdepti» aýdymy bilen tamamlandy, ony aýtmak üçin Balkan welaýatyndan tanymal aýdymçy Söýünmämmet Hudaýerdiýew çagyryldy. Diňleýjiler bu üýtgeşik esere gowy baha berdiler.

Sahna konsertiň hormatly myhmany, Mariinsk teatrynyň direktory Alekseý Wasiliýewiç Ýemelyanow çykdy.

Ýeri gelende aýtsak, Röwşen Nepesowdan başga-da kontrabasçy Aşyr Weliýewden we deprekçi Aram Bezikýandan ybarat «Nepesow trio» konsertiň ertesi VII Halkara Duşanbe etno-jaz festiwalyna gatnaşmak üçin Täjigistana ugrady.