Ugurdaş bilim programmasy Aşgabatda «Milli teatr mekdebi» bilim taslamasynyň rezidensiýasynyň şahadatnamasyny gowşurmak dabarasy bilen tamamlandy.

Üç günüň dowamynda taslamanyň diňleýjileri – Türkmenistanyň milli teatrlarynyň artistleri we Türkmen döwlet medeniýet institutynyň talyplary teatr sungatynyň dürli ugurlary boýunça ussatlyk sapaklaryna, okuw-türgenleşiklerine we amaly sapaklara gatnaşdylar.

Russiýanyň Milli drama teatrynyň (Aleksandr teatry), Sankt-Peterburg döwlet uniwersitetiniň we Russiýanyň sahna sungaty döwlet institutynyň wekilleri türkmen kärdeşlerine häzirki zaman teatr işindäki täzelikler, şeýle hem täzeçil dolandyryş barada gürrüň berdiler.

Aleksandr teatrynyň direktory Sergeý Ýemelýanow öz çykyşynda:

– Biz Türkmenistanda üç güni döredijilikli bir aý ýaly geçirdik. Teatrlaryň, medeniýet edaralarynyň birnäçesine baranymyzda ýurduň ýolbaşçylarynyň Türkmenistanda biziň ulgamymyza ýokary derejede üns berýändigine göz ýetirdik.

Elbetde, şunda Prezident Serdar Berdimuhamedowyň we türkmen halkynyň Milli Lideri Gurbanguly Berdimuhamedowyň hyzmaty uludyr. Russiýanyň Prezidenti Wladimir Putine tüýs ýürekden minnetdarlyk bildiresim gelýär, sebäbi Prezidentiň başlangyjy bilen döredilen Medeniýet başlangyçlary gaznasynyň goldawy netijesinde «Milli teatr mekdebi» döredildi we geçirildi.

Meýilleşdirilen taslamalaryň köpüsini durmuşa geçirip bileris diýip umyt bildirýäris. Hemmämizi türkmen-rus teatr uly dostlugynyň başlanmagy bilen gutlaýaryn.

Beýik Saparmyrat Türkmenbaşy adyndaky Baş akademiki drama teatrynyň sahnasynda bolan dabaranyň ahyrynda Sankt-Peterburgdan gelen myhmanlara türkmen dony we ýadygärlik sowgatlar gowşuryldy.