Ýakyn wagtda Awaza milli syýahatçylyk zolagynda geçiriljek halkara tans we halk döredijiligi festiwalyna Daşoguz welaýatynyň medeniýet işgärleri hem işjeň gatnaşarlar.

Ýurdumyzyň demirgazyk sebitinden Balkan welaýatyna meşhur bagşylary, aýdymçylary, tansçylary, şol sanda welaýatyň folklor toparlaryny-da öz içine alýan abraýly wekiliýet ugrar. Olar halkymyzyň özboluşly medeni däplerini aýdyň görkezýän birnäçe täsirli konsert çykyşlaryny taýýarladylar, şolaryň arasynda aýdymly tans we horeografik çykyşlar-da bar. Mundan başga-da, ýerli artistler sebitde giňden ýaýran we türkmeniň milli amaly-haşam sungatynyň halk senetçiliginiň gadymy görnüşlerine degişli bolan keçe basma senedini görkezip we foruma gatnaşýanlara, şeýle hem tomaşaçylara özleriçe ýerine ýetirilýän hüwdüleri hödürlärler.

Daşoguz welaýaty döredijilik zehinine baý. Onuň medeniýet äleminiň iň ösen we aýdyň ugurlarynyň arasynda bagşyçylyk sungaty, şol sanda asyrlap emele gelen milli ruhy we medeni gymmatlyklarydyr däp-dessurlary ussatlyk bilen beýan edýän ökde sazanda we aýdymçy bolan dessançy bagşylary-da öz içine alýan bagşy sungaty möhüm orun tutýar. Sebitde onlarça dürli aýdym-saz, tans we etnografik toparlar işleýär, olaryň käbiri dürli halkara forumlarynda birnäçe gezek üstünlikli çykyş eden toparlardyr. Döwlet maýa goýumlarynyň kömegi bilen bu ýerde halkara ülňülerine laýyk gelýän köp sanly döwrebap edaralary birleşdirýän medeniýet pudagy üçin berk maddy-tehniki esas döredildi.