Türkmenistanda ýokary okuw mekdepleriniň talyplarynyň arasynda her ýyl geçirilýän «Talyp joşguny – 2023» döredijilik festiwaly uly baýramçylyk konserti bilen tamamlandy.

Şu ýyl Türkmenistanyň Magtymguly adyndaky ýaşlar guramasynyň Merkezi geňeşiniň Bilim ministrligi bilen bilelikde guran festiwalyna ýurdumyzyň 24 ýokary mekdebiniň wekilleri gatnaşdy. Onda zehinli ýaşlarda özleriniň döredijilik we akyl-bilim ukyplaryny doly görkezmek mümkinçiligi boldy.

Bäsleşik maksatnamasynyň şertlerine görä, onuň dürli etaplarynda talyplardan Gahryman Arkadagymyzyň eserleriniň mazmuny esasynda döredilen ýumuşlary ýerine ýetirmek teklip edildi.

Mundan başga-da, festiwala gatnaşýanlar ýylyň «Arkadag Serdarly bagtyýar ýaşlar» şygaryna uýgun sazly kompozisiýalary, çeper goşgy okalyşy taýýarlamaly, halk döredijiliginden parçalary ýerine ýetirmeli, şeýle hem tansly çykyşlary ýerine ýetirmeli boldular.

Emin agzalary tarapyndan bellenen iň oňat döredijilik toparlary Aşgabadyň gözel künjekleriniň birinde geçirilen festiwalyň jeminde çykyş etmek hukugyny aldy.

Iň gowy çykyşlardan ybarat jemleýji konsert tomaşaçylara we gatnaşýanlara okuwda-da, şahsy ösüşde-de täze belentliklere ýetmek üçin, ýatdan çykmajak duýgulary we ylham bagyş etdi. Festiwalyň ahyrynda talyplara hormatly Prezidentimiziň adyndan we Bilim ministrligi tarapyndan ýadygärlik sowgatlar gowşuryldy.