Magtymguly adyndaky milli sazly drama teatrynda Tahyr Ataýewiň orkestriniň konserti boldy. Onda dirižýor ýene-de tomaşaçylary dünýä aýlanyp çykmak üçin, hyýaly “uçara münmäge” çagyrdy. “Ýene-de” diýýäris, çünki Tahyr Ataýewiň zehininiň muşdaklary saz arkaly eýýäm birnäçe ýurda aýlanyp çykdylar.

Ussadyň ýatlatmagy bilen, uçuşyň howpsuzlygy üçin, tomaşaçylar “howpsuzlyk kemerlerini dakyndylar” we güneşli Türkmenistanyň paýtagtyndan asmana galan uçar bir yklymdan başga birine uçup, Londonda gondy. Trewor Joünziň “Around the World Overture” atly meşhur eseriniň owazy astynda tomaşaçylar wideo görnüşler arkaly dumanly ýurduň paýtagtynyň gözel ýerleri bilen tanyşdylar.

Soňra “ýolagçylara” Parižiň ajaýyp köçeleri, Berliniň çüwdürimleri we ýadygärlikleri, Afinynyň, Rimiň, Stambulyň binagärligi, Nýu-Yorkuň başy gök direýän binalary we dünýäniň beýleki ýurtlarynyň paýtagtlary garaşýardy. Olar Türkmenistana-da degip geçdiler, bu ýerde Nury Halmämmedowyň “Hüwdi” sazy astynda ak mermerli Aşgabadyň görnüşinden lezzet aldylar. Konsert 17 döwlete “baryp görmegi” öz içine aldy we olaryň her biri üçin saz ýaňlandy, özi-de tomaşaçylara tanyş we söýgüli sazlar ýaňlandy.

Ýerine ýetirilen eserleriň arasynda Ýogan Sebastian Bahyň “Degişme”, Mikis Teodorakisiň “Sirtaki” sazlary, “Hawa Nagila” ýewreý halk aýdymy, Frank Sinatranyň “Gowy. Erbet. Gaharly” filmindäki saz ýazgysy, Astor Piýatstsollanyň “Adios Nonino” eserleri-de bardy.

Konsert tamamlanandan soň, Tahyr Ataýew sazandalaryň ählisini: Guwanç Şammyýewi (akkordeon), Mansur Şaripowy (wokalçy), Aýmyrat Saparmyradowy (prima dutar), Emir Baýramgeldiýewi (fleýta), Şirhan Batyrowy (saksafon) sahna çagyryp: “Kimi gaýtalap diňlemek isleýärsiňiz?” diýen sorag bilen tomaşaçylara ýüzlendi. “Balalaýkany” diýip, tomaşaçylaryň bary biragyzdan jogap berdi. Gep şunda: daşky görnüşi we çykarýan sesi boýunça türkmen halk saz guraly prima dutar rus halk saz guraly balalaýkany ýada salýar.

Tomaşaçylaryň biragyzdan eden haýyşy boýunça Aýmyrat Saparmyradow Mihail Iwanowiç Glinkanyň “Kamarinskaýa” atly hyjuwly sazyny ikinji gezek ýerine ýetirdi.