Mary şäherinde Türkmenistanyň ÝUNESKO girmeginiň 30 ýyllygy we ÝUNESKO-nyň Maddy däl medeni mirasy goramak konwensiýasyny kabul etmeginiň 20 ýyllygy mynasybetli, dabaraly çäreler geçirildi.
Mary welaýat kitaphanasynyň öňündäki meýdançada baýramçylyk sergisi açyldy. Sergide çeper eserler, türkmen edebiýatynyň nusgawy şahyry Magtymguly Pyragynyň portretleri, şaý-sepler, şeýle hem halkyň milli mirasynyň nyşanlary – türkmen halylary, ýüň önümleri, keşdeler, saz gurallary görkezildi.
Türkmenistanyň 1993-nji ýylyň 17-nji awgustynda Londonda degişli resminamany tassyklap, ÝUNESKO-nyň doly agzasy bolandygyny ýatladýarys. 1994-nji ýylda biziň ýurdumyz ÝUNESKO-nyň Bütindünýä medeni we tebigy mirasy goramak baradaky konwensiýasyna goşuldy. Şu güne çenli Türkmenistanda 1000-den gowrak taryhy we medeni ýadygärlik tapylyp, hasaba alyndy.
Türkmeniň köp sanly milli gymmatlyklary – halyçylyk, dutar ýasamak we bagşyçylyk sungaty ÝUNESKO-nyň Adamzadyň maddy däl medeni mirasynyň sanawyna girizildi.
2022-nji ýylda Türkmenistanyň başlangyjy bilen ÝUNESKO-nyň Adamzadyň maddy däl medeni mirasynyň sanawy “Türkmen keşde sungaty”, “Ýüpekçilik we dokma üçin adaty ýüpek önümçiligi”, “Ependi baradaky tymsallary gürrüň bermek” ýaly maddy däl miras görnüşleri bilen dolduryldy.
Şu ýyl ÝUNESKO-nyň Ýerine ýetiriji geňeşiniň 216-njy mejlisinde türkmeniň akyldar şahyry Magtymguly Pyragynyň golýazmalar ýygyndysyny “Dünýä hakydasy” halkara sanawyna goşmak barada karar kabul edildi. Welaýat kitaphanasynyň mejlisler zalynda geçirilen maslahatyň dowamynda şu we beýleki wakalar ara alnyp maslahatlaşyldy.
Mary welaýatynyň häkiminiň orunbasary Arzygül Orazowa, Türkmenistanyň Medeniýet ministrliginiň maddy däl miras bölüminiň müdiri Gözel Magtymgulyýewa, “Maru-Şahu Jahan” welaýat gazetiniň bölüm redaktory Sülgün Şadyýewa, Marynyň taryh we ülkäni öwreniş muzeýiniň müdiriniň orunbasary Ýazgül Tirkişowa dagy “Türkmenistan umumadamzat gymmatlyklarynyň daýanjydyr” temasy boýunça çykyş etdiler.
Çykyş edenler türkmen halkynyň siwilizasiýanyň we dünýä medeniýetiniň emele gelmegine goşant goşandynyň aýratyn ähmiýetini bellediler. Duşuşygyň dowamynda Mary welaýatynyň ülkäni öwreniş muzeýine gezelenç we “Gadymy Merw” temasyna bagyşlanan maslahat geçirildi.
Çäreler Türkmenistanyň Medeniýet ministrligi we ÝUNESKO-nyň işleri boýunça Milli komissiýasy tarapyndan guraldy. Soňra maslahata gatnaşanlar “Gadymy Merw” döwlet taryhy we medeni goraghanasyna baryp görerler.
