Medeniýet we sungat işgärleriniň hem-de Magtymguly Pyragynyň şygryýet gününiň öňüsyrasynda bu möhüm waka bagyşlap paýtagtymyzyň Erkin döredijilik mekanynda ýaş habarçylaryň, şahyrlaryň, ýazyjylaryň, terjimeçileriň we talyplaryň duşuşygy geçirildi.

Her ýylyň 27-nji iýunynda ýurdumyzda Medeniýet hepdeligine gabat gelýän hünär baýramçylygy görnükli sungat işgärleri tarapyndan bellenilýär.

Ençeme ýyllaryň dowamynda esasy dabaralaryň geçirilýän ýeri welaýatlaryň merkezi bolýardy.

Bu ýyl ak mermere beslenen Aşgabat şäheri ýurdumyzyň dürli künjeklerinden geljek döredijilik wekiliýetlerini kabul eder.

Medeniýet hepdeligi – 2023-iň çäginde sungatyň we çeper döredijiligiň dürli görnüşlerinden köp sanly çäreler geçiriler.

Türkmen döwlet neşirýat gullugy «Edebiýat we sungat» gazetiniň redaksiýasy bilen bilelikde guran döredijilik duşuşygy hem ýakyn wagtda geçiriljek medeni çäräniň özboluşly buşlukçysy boldy.

«Edebiýat we sungat» gazetiniň bölüm müdiri, şahyr, Türkmenistanyň Gahrymany Amangözel Şagulyýewa çärä gatnaşyjylaryň öňünde çykyş etdi.

Halk ýazyjysy, döredijilik işiniň iň ajaýyp pursatlary baradaky ýatlamalary diňleýjiler bilen paýlaşdy.

Soňky kyrk ýylyň dowamynda onuň durmuşy söýgüli gazetiniň işleri bilen aýrylmaz baglanyşykly boldy.

Gazetde işlän döwründe baý tejribe toplap we häzirki zaman türkmen edebiýatynyň görnükli wekilleri bolan şahyrlar hem-de ýazyjylar bilen döredijilik gatnaşygyny saklaýan Türkmenistanyň Gahrymany Amangözel Şagulyýewa Watan bähbidi üçin işlemegini dowam etdirip, ata-babalarymyzyň wesýetlerine, şeýle hem Gahryman Arkadagymyzyň, hormatly Prezidentimiz Serdar Berdimuhamedowyň parasatly syýasatyna eýermekde ýaşlara halypaçylyk edýär.

Çykyşynyň ahyrynda şahyr täze goşgularyny okap, tomaşaçylary begendirdi.

Döredijilik duşuşygyny M.Kulyýewa adyndaky Türkmen milli konserwatoriýasynyň uly mugallymy, Türkmenistanyň halk artisti Akmyrat Çaryýew dowam etdirdi.

Mugallym türkmen sungatynda öçmejek yz goýan ägirtler we halk bagşylary barada gürrüň berdi.

Sazanda ýaşlykda meşhur bagşy Sahy Jepbarow bilen bilelikde çykyş etmek bagtyna eýe bolupdy.

Döredijilik duşuşygyna gatnaşýanlaryň arasynda meşhur bagşy Sahy Japbarowyň agtygy hem bardy. Ol öz çykyşynda Arkadag şäherindäki ýöriteleşdirilen sungat mekdebine atasy Sahy Jepbarowyň adynyň dakylandygy üçin türkmen halkynyň Milli Liderine we Türkmenistanyň Prezidentine hoşallygyny bildirdi.

Soň bolsa atasyndan ýädigärlik galan dutarda «Atçapar» milli sazyny ýerine ýetirdi.

Döredijilik duşuşygy Maýa Kulyýewa adyndaky Türkmen milli konserwatoriýasynyň ýanyndaky Daňatar Öwezow adyndaky Türkmen döwlet ýörite sazçylyk mekdebiniň tüýdükçiler toparynyň çykyşy bilen dowam etdi.

Geljek ýyl akyldar şahyr Magtymguly Pyragynyň 300 ýyllygy Türkmenistanda giňden belleniler, şonuň üçin Türkmenistanyň at gazanan artisti Ýagmyr Gurbannazarow beýik şahyryň goşgularyny labyzly ýerine ýetirdi.

Akyldar şahyr Magtymguly Pyragynyň goşgularyny labyzly okamakda ýurdumyzda giňden tanalýan radio işgäri Setdar Abdyew öz işleri we halypalary barada gürrüň berdi.

Türkmenistanyň halk ýazyjysy Döwletgeldi Annamyradow öz döreden täze eserlerini duşuşyga gatnaşyjylara okap berdi.

«Türkmenistan Sport» halkara žurnalynyň baş redaktory H.Apbaýew žurnalyň sahypalarynda diňe bir ýurdumyzdaky möhüm sport wakalary däl, eýsem medeni miras we sungat işgärleri barada hem makalalar berilýändigini gürrüň berdi.