Türkmen döwlet medeniýet institutynda soňky synaglar tamamlandy. Yhlasly okuw ýyllary, diplom işi yzda galdy, indi diňe zähmetiň bilen tejribe toplamaly.

Bu ýyl uçurymlar halypalarynyň garamagyna türkmen, daşary ýurt we rus nusgawy edebiýatynyň awtorlarynyň eserleri esasynda sahnalaşdyrylan birnäçe çynlakaý diplom işlerini hödürlediler.

Mollanepes adyndaky Talyplar teatrynyň sahnasynda Anton Çehowyň, 200 ýyllyk ýubileýi jemgyýetçilik köpçüligi tarapyndan bellenilen Aleksandr Ostrowskiniň, Prosper Merimäniň we beýleki görnükli dramaturglaryň meşhur.

Nusgawy eserleriň mydama möhümdigini subut edýän zehinli ýigitler we gyzlar meşhur edebi gahrymanlaryň keşplerini döretdiler. Işe ýaňy başlaýan režissýorlar nusgawy eserleri drama teatrynda ýöredilýän däplere kybap sahnalaşdyrmaga synanyşdylar.

Režissýorlyk bölümini uçurymy Pirmämmet Galandarow talyplar bilen Anton Pawlowiç Çehowyň «Ýubileý» pýesasyny goýdy. Ygtybarly halypalar-- çeper ýolbaşçysy Çaryýar Seýidow, şeýle hem aktýorlyk ussatlygy we sahna hereketi mugallymlary oňa ilkinji uly spektakly sahnalaşdyrmaga kömek etdiler. Pirmämmet Galandarow: «Sahna eserini saýlanymda, bu ýa-da beýleki edebi eseriň çuň many berşinden ugur alýardym. Çehowyň «Aýy» we «Teklip» pýesalary sahnalaşdyrylan Akademiki baş drama teatrynyň spektakllaryny görenimden soň, haýsy eseri saýlamalydygym barada belli-külli netijä geldim. Talyplar kitaphanasynda Anton Pawlowiçiň «Ýubileý» pýesasynyň türkmençe terjimesine gabat geldim-de, gutardyş spektaklym hakda pikirlenip başladym» - diýip, gürrüň berdi.

Spektakla aktýorlyk bölümiň ikinji ýyl talyplary çagyryldy.

Ýaşlar ukyp-başarnyklaryny ýüze çykarmak üçin jan edýärdiler. Umumy işde bilelikdäki sahna çözgütleri kemala gelýärdi. Spektakl nusgawy bolansoň, onuň saz bezeginde Çaýkowskiniň we Mosartyň eserleri ulanyldy.

Şeýle hem Aleksandr Ostrowskiniň «Harasat» pýesasy esasynda spektakl sahnalaşdyrylanda iş gyzgalaňly gitdi. Bu spektakly Türkmenistanyň halk artisti Aşyrmyrat Gurbanowyň ýolbaşçylygynda aktýorlyk bölüminiň uçurymlary taýýarladylar.

Uçurymlaryň şowly diplom işleri Mollanepes adyndaky Talyplar teatrynda birnäçe gezek görkezildi. Ýakyn wagtda Türkmen döwlet medeniýet institutynyň ýaş hünärmenleri teatr işgärleriniň hataryna goşularlar.