Şu gün – 4-nji iýulda Arkadag şäheriniň Aman Gulmämmedow adyndaky döwlet drama teatrynda Birleşen halk saz gurallary ansamblynyň konserti guraldy. Onda ýurdumyzyň meşhur aýdymçylary çykyş etdiler.

Arkadag şäheriniň dabaraly açylan gününden bäri, bu ýerde dürli halkara forumlar we medeni çäreler yzygiderli geçirilip gelinýär. Şäheriň döwlet drama teatrynda geçirilen şu gezekki konserte hem köpsanly ildeşlerimiz gatnaşdylar. Ýurdumyzyň sungat ussatlarynyň ýerine ýetirmeginde Magtymguly Pyragynyň we şahyrlarymyzyň meşhur şahyrana eserlerine döredilen aýdymlaryň owazy bu ýere ýygnananlaryň ruhuny belende göterdi. Her bir çykyşyň ahyry tomaşaçylaryň şowhunly el çarpyşmalaryna beslendi.

Arkadag şäheriniň ähli desgalarynda bolşy ýaly, Aman Gulmämmedow adyndaky döwlet drama teatry hem ähli amatlyklara eýedir. Teatrda sahna ussatlarynyň kämil eserleri döretmekleri we bu ýere gelýän tomaşaçylaryň medeni dynç almagy üçin ähli mümkinçilikler göz öňünde tutulypdyr. Teatryň tomaşa zalynda ornaşdyrylan häzirki zaman yşyklandyryş we ses enjamlary bu ýerde goýulýan sahna oýunlaryny has-da täsirli etmäge döwrebap mümkinçilikleri berýär.

Ozal habar berşimiz ýaly, täze teatr düýn – 3-nji iýulda özüniň ilkinji sahna eserini tomaşaçylara hödürledi.