«Türkmenistan» kinokonsert merkezinde «Film! Film! Film!» atly estrada konserti uly üstünlik bilen geçirildi. Konsertiň maksatnamasyna dürli ýyllardaky halkyň söýgüsini gazanan filmleriň aýdymlary girizildi.

Guramaçylaryň asyl pikirine görä, sahna film surata düşürilýän topluma, tomaşaçylar bolsa filmi surata düşürýän topara öwrüldi.

Konserti alyp baryjylar Aýlar Baýramowa we Anna Hommadowa dagy konsert görnüşinde surata düşürilýän filmiň režissýory bilen onuň kömekçisiniň rollaryny ýerine ýetirdiler.

– Operatorlar taýynmy? – diýip Aýlar tomaşaçylara ýüzlendi.

– Surat birinji, dubl birinji! – diýip Anna aýdýar we Ýazbibi Sapargeldiýewa sahna çykýar. Ol kinofilmden «Ak gara» diýen aýdymy ýerine ýetirdi.

Tutuş konsert şeýle oýunly ýagdaýda geçirildi.

«Almaz goly», «Karnawal», «Богемская рапсодия», «Titanik», «Ирония судьбы или С легким паром» filmleriniň we «Aýgytly ädim» filminden «Aýnanyň balladasy» aýdymlary ýerine ýetirildi. Mundan başga-da, wokalçylar filmleriň gahrymanlarynyň geýimlerinde çykyş etdiler. Grigoriý Ambarsumow «Белое солнце пустыни» filminden Petruhanyň keşbini ýerine ýetirdi. Konsert meşhur aýdymçy Ýelena Oreşkina tarapyndan ýerine ýetirilen «Karnawal gijesi» filmindäki «Хорошее настроение» aýdymy bilen tamamlandy.

Marta Giris we Aleks Kuw ýaly ähli ýerine ýetirijiler bilen birlikde konserti gurnaýjylar Oksana Bagramowa we Alina Gostewa hem tomaşaçylaryň el çarpyşmalary bilen sahna çykdylar.

Konsert aýdymlary, şeýle hem kinematografiýa dünýäsi bilen tomaşaçylaryň ruhuny göterdi.