Kino muşdaklary we täze başlaýan kinoçylar Merkezi Aziýanyň «48 sagatda surata düşürmeli» atly gysga film bäsleşiginiň çäginde Aşgabatda guralan film görkezilişine gatnaşdylar.
Türkmenistanly kinematograflar bu döredijilik bäsleşigine her ýyl gatnaşýarlar. Bu ýyl bäsleşige biziň ýurdumyzdan gysga filmleriň 18-si hödürlendi. Ilkinji tomaşaçylar we bäsleşige gatnaşýanlar ildeşlerimiziň filmlerine baha berip, gazagystanly, gyrgyzystanly, täjigistanly we özbegistanly kinoçylaryň işleri bilen tanyşdylar.
Aşgabatdaky filmleriň bäsleşigi ildeş kinoçylarymyzyň işleri bilen açyldy. Tomaşaçylar filmleri görenlerinden soň, zalda oturan awtorlar bilen filmleri ara alyp maslahatlaşmak, sorag bermek we gören zatlaryndan galan täsirlerini beýan etmek mümkinçiligine eýe boldular.
Iň gowy 48 filmi seçip alyş komitetiniň agzasy Batyr Berdiýewiň belleýşi ýaly, şu ýyl türkmen film söýüjileriniň köp gysga filmleriniň esasy medeniýet we ýaşaýyş terzi boldy.
Ýordumlaryň ählisinde-de gatnaşyklar, maşgala hem-de millet ýaly gymmatlyklar ulgamy biri-biri bilen jebis utgaşýar. Maşgala agzalarynyň gatnaşyklaryna — ene-atalar bilen çagalaryň, är-aýalyň arasyndaky gatnaşyklara aýratyn üns berildi.
Käbir film eserleri derňelenden soň, filmi surata düşüren toparlaryň wekilleri özleriniň bäsleşigine gatnaşyşlary barada gürrüň berdiler. Awtorlaryň köpüsi oňa ilkinji gezek gatnaşmaýarlar, ýöne geljekde üstünlik gazanjagyna uly umyt besleýän ilkinjiler-de bar. Bu – adaty zat, sebäbi bäsleşigiň gatnaşyjylary höweslendirýän iň esasy baýragy – Nýu-Ýork film akademiýasynda ýeňillikli bilim almak mümkinçiligi ahbetin.
Bäsleşige gatnaşanlaryň aýtmagyna görä, «48 sagatda surata düşürmeli» bäsleşigiň kyn şertlerinden biri-de wagtyň çäkliligidir. Bary-ýogy 2 günüň içinde edebi ýazgysyny ýazyjylar, režissýorlar, wideomontaž hünärmenleri, operatorlar we aktýorlar çuňňur manyly kiçijek film döretmäge synanyşýarlar.
– Men ilkinji gezek ýaryşa film iberdim – diýip, Ahmet Ýusubow gürrüň berýär. – Toparymyzdakylaryň ählisine, film surata düşürilýärkä bize kömek eden hemmelere hoşallyk bildiresim gelýär. Kino – meniň esasy hünärim däl, men başga ugurdan okadym. Ýöne kino döredijiliginde ilkinji ädimlerimi ätmekden diýseň göwnüm hoş. Ýurdumyzdan birnäçe ýeňiji çykar diýip umyt edýärin. Şonuň üçin-de hemmelere üstünlik arzuw edýärin!
2023-nji ýyldaky gysga film bäsleşiginiň ýeňijileri sentýabr aýynda yglan ediler. Esasy ugurlardan başga-da, guramaçylar bolup biljek goşmaça kategoriýalar, şol sanda ýörite emin baýragy barada-da aýdýarlar. Türkmenistandan saýlanan filmler bäsleşige gatnaşýan ýurtlarda-da görkeziler.
