Bilimler we talyp ýaşlar gününde, ýagny 1-nji sentýabrda ýurdumyzyň ähli teatrlarynda türkmeniň beýik akyldar şahyry Magtymguly Pyragynyň ömrüne we döredijiligine bagyşlanan sahna oýunlaryň görkezilişi bolar.
2024-nji ýylda ýurdumyzda akyldar şahyryň doglan gününiň 300 ýyllygy belleniler. Bu şanly sene mynasybetli uly medeni-seýilgäh toplumynyň we şahyryň ýadygärliginiň dabaraly ýagdaýda açylmagyna garaşylýar.
Ýakynda iş sapary bilen paýtagtymyza aýlanan türkmen halkynyň Milli Lideri ýurdumyzyň teatrlarynda mekdep okuwçylarydyr talyplaryň gatnaşmagynda Magtymguly Pyraga bagyşlanan sahnalary goýmagyň maksada laýykdygyny belläp geçdi.
Akyldar şahyrymyzyň baý döredijiligine hormat goýmak bilen Halk Maslahatynyň Başlygy Gurbanguly Berdimuhamedow özüniň «Pähim-paýhas ummany Magtymguly Pyragy» atly täze ýazan goşgusyny şahyra bagyşlady.
Bu şygyrýet eseriniň tanyşdyrylyş dabarasy 18-nji awgustda Magtymguly adyndaky milli sazly drama teatrynda geçirildi.
