14-15-nji oktýabrda Merkezi Aziýa ýurtlarynyň gatnaşmagynda Arkadag şäherinde «Arkadagyň säheri» atly film festiwalyny geçirmek meýilleşdirilýär. Bu çärä taýýarlyk Türkmenistanyň Ministrler Kabinetiniň şenbe güni geçirilen mejlisinde ara alnyp maslahatlaşyldy. Kino festiwalynyň esasy maksady ýaş zehinleri ýüze çykarmak, türkmen kino sungatyny ösdürmek, ýaşlara watançylyk terbiýesini bermek, şeýle hem dünýä jemgyýetçiligini Arkadag şäheriniň sanly ulgamynyň mümkinçilikleri we ösen tehnologiýalar bilen enjamlaşdyrylyşy bilen tanyşdyrmak we daşary ýurtly hyzmatdaşlar bilen netijeli gatnaşygy artdyrmakdyr.
Hormatly Prezidentimiz Serdar Berdimuhamedowyň Hökümet mejlisinde belleýşi ýaly, Arkadag şäherinde geçiriljek film gözden geçirilişi Merkezi Aziýanyň ýurtlary we halklary bilen däp bolan dost-doganlyk gatnaşyklaryny has-da pugtalandyrar hem-de sebit hyzmatdaşlygynyň aýrylmaz möhüm bölegi bolan medeni hem gumanitar gatnaşyklary baýlaşdyrmaga goşant goşar.
«Arkadagyň säheri» film festiwalyna taýýarlyk Türkmenistanyň Döwlet telewideniýe, radio ýaýlymy we kinematografiýa boýunça komiteti tarapyndan utgaşdyrylýar. Deslapky maglumata görä, film festiwalynyň bäsleşik maksatnamasyna Merkezi Aziýanyň her bir ýurdundan, bolup bilse, ýaş kinorežissýorlar tarapyndan döredilen iki sany gysga çeper film kabul ediler. Emin agzalygyna we hormatly myhman hökmünde kinofestiwala beýleki ýurtlardan kino sungatynyň tanymal wekilleri çagyryldy. Film festiwalyna hödürlenen filmleriň görkezilişi Arkadag we Aşgabat şäheriniň kinoteatrlarynda geçiriler.
Film festiwalyna gatnaşjaklar we myhmanlar üçin gyzykly medeni maksatnama we «akylly» Arkadag şäheri boýunça gezelençler taýýarlanýar. Film festiwalynyň çäginde Türkmen Döwlet medeniýet institutynyň talyplary üçin ussatlyk sapaklaryny geçirmek hem meýilleşdirilýär. Eýýäm özbegistanly, täjigistanly we gyrgyzystanly kinematografçylardan ýakyn wagtda geçiriljek bu film festiwalyna gatnaşmak üçin ilkinji ýüz tutmalar gelip başlady.
