Alp Arslan adyndaky milli drama teatrynyň toparynyň görkezen «Magtymguly Pyragy» oýny I «Biken» Halkara teatr festiwalynda eminleriň mynasyp bahasyny aldy.

Teatryň çeper ýolbaşçysy, Türkmenistanyň at gazanan artisti Handurdy Berdiýew teatr we kino aktrisasy Biken Rimowanyň 100 ýyllygy mynasybetli geçirilen festiwalda drama oýnuň iň gowy režissýorlygy üçin diplom we altyn medal bilen sylaglandy.

Sahna suratkeşi Mekan Annamyradowa iň gowy sahna bezegi üçin Ýadygärlik kubogy gowşuryldy. Mundan başga-da, Alp Arslan adyndaky milli drama teatrynyň toparyna Halkara türk medeniýeti guramasynyň (TÜRKSOÝ) diplomy, Taldykorgan welaýatynyň akimatlygynyň minnetdarlyk haty we 400 müň gazak teňňesi möçberinde baýrak gowşuryldy.

Türkmen teatr toparynyň öwüşginli oýny beýik akyldar şahyr Magtymguly Pyragynyň ömri we döredijiligi barada gürrüň berýär. Nusgawy türkmen şygryýetiniň düýbüni tutan şahsyň keşbini sahnada Türkmenistanyň at gazanan artisti Döwlet Hanmämmedow ezberlik bilen janlandyrdy. Oýunda şahyryň goşgulary we parasatly sözleri ýaňlandy.

Gazagystanyň Taldykorgan şäherinde 29-njy sentýabrdan 5-nji oktýabr aralygynda geçirilen I «Biken» Halkara teatr festiwaly Gazagystan Respublikasynyň Medeniýet we sport ministrliginiň, Žetysu welaýatynyň akimatynyň we TÜRKSOÝ Halkara guramasynyň goldawy bilen geçirildi.

Bir umumy sahnada Azerbaýjanyň, Gazagystanyň, Gyrgyzystanyň, Türkiýäniň, Türkmenistanyň we Özbegistanyň teatr jemgyýetleriniň wekilleri iň gowy eserlerini görkezdiler. Şeýle hem festiwalyň çäginde Biken Rimowanyň döredijiligine we sahna sungatyna goşan goşandyna bagyşlanan konferensiýa geçirildi.