Türkmenistanyň Telewideniýe, radiogepleşikler we kinematografiýa baradaky döwlet komiteti Türkiýe döwlet teleradiokompaniýasynyň (TRT) Türkmenistandaky wekiliýeti bilen bilelikde ýurdumyzyň Garaşsyzlygynyň 32 ýyllygy we Türkiýe Respublikasynyň 100 ýyllygy mynasybetli paýtagtymyzyň «Aşgabat» kinoteatrynda çäre geçirdiler.
Çäräni Aşgabatdaky TRT-niň wekilhanasynyň başlygy Ugur Sami Gezer açyp, iki ýurduň halklarynyň taryhy we medeni kökleri umumy bolan Türkiýäniň we Türkmenistanyň hyzmatdaşlygyna aýratyn ähmiýet berilýändigi, şeýle hem TRT öz ýaýlymlary arkaly türkmen halkynyň ykdysadyýeti, medeniýeti we däp-dessurlary barada ygtybarly maglumatlaryň ýaýramagyna ýardam edýändigi barada türkmen dilinde gürrüň berdi.
TRT-niň alyp barýan işleri barada görkezilen şekilli görnüşler birnäçe onýyllyklaryň dowamynda dürli teleýaýlym kanallary, radio stansiýalary we internet arkaly dünýäniň 41 dilinde halkara tomaşaçylaryna giň ýaýrandygy barada düşünje berdi.
Balkanlarda, Merkezi Aziýada, Ýakyn Gündogarda we Kawkazda ýaýlyma berilýän 2009-njy ýylda teleýaýlyma goýberilen «TRT Avaz» telekanalyna bagyşlanyp aýratyn wideoşekil hem görkezildi. «Dilde, pikirlenişde we işde agzybirlik» şygary bilen işleýän bu kanal dokumental filmleri, gepleşikleri, medeni we aýdym-saz gepleşikleri, sebit filmlerini we teleseriallaryny ýaýlyma berýär.
Türkmenistanyň Telewideniýe, radiogepleşikler we kinematografiýa baradaky döwlet komitetiniň başlygynyň orunbasary Annasähet Kakaýew öz çykyşynda Türkmenistanyň Telewideniýe, radiogepleşikler we kinematografiýa baradaky döwlet komitetiniň TRT bilen halkara hyzmatdaşlygynyň ösmegine möhüm ähmiýet berýändigini aýtdy.
Halkara hyzmatdaşlygyň kanuny esaslary güýçlendirilýär, tejribe alyşmaga we türkmen teleýaýlymlarynyň we radio žurnalistleriniň, kinorežissýorlarynyň işini gowulandyrmaga kömek edýän dürli çärelerde gatnaşyklar has-da giňelýär. Bu oňyn işiň aýdyň subutnamasy «Arkadagyň säheri» atly halkara kinofestiwalyň Türkmenistanda üstünlikli geçirilmegi boldy.
Soňra çykyş eden TRT-niň daşary gatnaşyklar bölüminiň müdiri Mustafa Sarytaş paýtagtymyzdaky wekilhanasy Merkezi Aziýada ilkinji bolup işläp başlan türk teleýaýlym we radio kompaniýasynyň halkara işlerini beýan etdi.
Türkmen-türk hyzmatdaşlygynyň netijeliligini aýdyň görkezýän mysallaryň biri hem ÝUNESKO-nyň Bütindünýä mirasynyň sanawyna girizilen Köneürgenjiň we gadymy Merwiň täsin taryhy ýadygärlikleri barada TRT tarapyndan taýýarlanan iki sany gysga dokumental filmiň görkezilmegi boldy.
