Aşgabadyň ýaşaýjylary we türkmen paýtagtynyň myhmanlary 3–5-nji noýabr aralygynda geçiriljek konsertlere, filmleriniň görkezilişine gatnaşyp, Koreýa Respublikasynyň medeniýeti hem-de dili bilen ýakyndan tanşyp bilerler.

Hepdelik Günorta Koreýanyň meşhur «ONDO» aýdym-saz toparynyň konserti bilen açylar. Toparyň solisti Çongsyl meşhur K-Pop aýdymlaryny we beýleki meşhur koreý aýdymlaryny ýerine ýetirer.

Konsert 3-nji noýabrda Magtymguly adyndaky milli sazly drama teatrynda sagat 19:00-da başlaýar. Konsert tölegsizdir. «Aşgabat» kinoteatrynda häzirki zaman koreý kinosynyň rus subtitrleri bilen görkezilişi bolar.

4-nji noýabrda sagat 15:00-da «Beýsbolçy gyz» filmi görkeziler. Film ilkinji gezek 2019-njy ýylda Pusanda geçirilen Halkara kinofestiwalynda görkezildi. Filmde ussatlar derejede oýnamagy arzuw edýän gyz hakda gürrüň berilýär. Emma ol maksadyna ýetinçä gender deňsizligine gabat gelýär. Bu filmdäki işi bilen aktrisa Li Çžu Ýon Günorta Koreýa kinomatografiýasynyň zehinli ýyldyzna öwrüldi. 

Şol gün sagat 17:00-da kino muşdaklaryna suwa böküji iki türgen hakda gürrüň berýän «Meşhur zenan» (2020 ý.) filmi görkeziler. Sagat 19:00-da «Gizlin haýwanat bagy» (2020 ý.) filminiň görkezilişi bolar. Onda haýwanat bagyny çökgünli ýagdaýdan alyp çykmaly bolan aklawçy barada gürrüň berilýär. Hekaýatyň gülkünç ýeri, haýwanat bagyny saklap galmak üçin onuň işgärleri haýwan derisine girmeli bolýarlar.

5-nji noýabrda sagat 10:00-da «Meşhur zenan», 12:00-da «Gizlin haýwanat bagy», 19:00-da «Beýsbolçy gyz» filmleri gaýtadan görkeziler.

Koreý medeniýetiniň hepdeligini Koreýa Respublikasynyň Türkmenistandaky Ilçihanasy gurady. Ýurdumyzda koreý dilini öwrenmäge uly höwes bildirilýär. Aşgabatda Koreýanyň şa Sejon (Sejong) adyndaky bilim merkezi işleýär. Ol ýerde koreý dilini we medeniýetini, däp-dessurlaryny öwrenmek isleýänlere bilim berilýär.